Almatyda qurylysy aıaqtalmaǵan 2 kópqabatty úı buzyldy

ALMATY. QazAqparat - Almatynyń «Zerdeli» shaǵyn aýdanynda salynyp bitpegen 2 kópqabatty úı buzyldy. Bul týraly qala ákimi Erbolat Dosaev málim etti, dep habarlaıdy QazAqparat tilshisi.

«Osy jyldyń maýsym aıyna deıin «Zerdeli» shaǵyn aýdanyndaǵy 30 úıdiń qalǵan 2-in nyǵaıtý jáne túzetý jumystary aıaqtalady. Sonymen qatar, 2022 jyldyń jeltoqsan aıynda qurylysy aıaqtalmaǵan 2 úı buzyldy. Ol jerde skver bolady»,- dedi shahar basshysy.

Buǵan deıin Erbolat Dosaev 2 kópqabatty úıdi buzý týraly «QazQSǴZI» AQ qorytyndysy baryn aıtqan bolatyn.

Eske salaıyq, 2019 jyly 11 jeltoqsan kúni Alataý aýdanyndaǵy «Zerdeli» shaǵyn aýdanynyń turǵyndary úıleriniń qısaıǵanyn aıtyp, dabyl qaqqan bolatyn.