Almatyda «Qurylysshylar» men «5 000 teńge» fılmderiniń kórsetilimi boldy
ALMATY. 30 sáýir. QazAqparat - Keshe Almatyda «Qurylysshylar» jáne «5000 teńge» anımatsııalyq fılmderiniń kórsetilimi ótti.
Olar Soros-Qazaqstan qorynyń «Jastar bastamasy» baǵdarlamasynyń jastar arasyndaǵy qysqametrajdy (oıyndyq, derekti, anımatsııalyq) kıno baıqaýynyń sheńberinde túsirilgen bolatyn. Baıqaýdyń maqsaty - kásipqoı, sondaı-aq áýesqoı kıno túsirýshi jastarǵa áleýmettik máselelerge degen óz kózqarasyn bildirýge kómek kórsetý jáne keıingi urpaqtyń solardy sheshýdegi atqaratyn rólin aıqyndaý.
«Baıqaýǵa 70-ke jýyq stsenarıı kelip tústi, sonyń arasynan baǵdarlamanyń Saraptamalyq komıteti ekeýin tańdap aldy. Baıqaýdyń nátıjeleri jarııalanǵannan keıin birneshe aı boıy stsenarıı avtorlary óziniń shyǵarmashylyq josparlaryn júzege asyrdy. Ár kartınanyń bıýdjeti 10 000 AQSh dollarynan aspaıtyn somany qurady»,- deıdi Soros-Qazaqstan qorynyń «Jastar bastamasy» baǵdarlamasynyń úılestirýshisi Sáýle Meıirmanova.
"Qurylysshylar" fılmi ótpeli kezeńdegi otbasynyń ómiri jaıly áńgimeleıdi. Biz bir shańyraqtyń taǵdyry arqyly mádenı deńgeıi ártúrli jandardyń úı salý áreketin arqaý ete otyryp, ǵalamdaný jaǵdaıyn kórsetkimiz keldi", - deıdi SerikÁbishev. Al Gleb Ponomarevtyń aıtýynsha, «5000 teńge» anımatsııalyq fılmi aqsha ony para retinde paıdalanǵan kezde neni «sezinedi» degen saýalǵa jaýap berýge tyrysady. Sıýjettiń barysynda kórermenniń kóz aldynda 5 myńdyq qaǵaz aqshanyń tutastaı ómiri beınelenedi. Sapar aldynda ol ádemi kúıinde ári shytyrlap turady, alaıda onyń ıeleri bir-birin aqsha sanaý mashınasyndaǵy shytyrlaý jyldamdyǵymen almastyryp otyrady. Jáne onyń árqaısysy qaǵaz aqshanyń taǵdyryna óz tańbasyn salyp ketedi.
