Almatyda qurylysshylar qubyrdy zaqymdap, úılerdi sýsyz qaldyrdy
ALMATY. QazAqparat - Almatyda qurylysshylar «Nur-Múbarak» ıslam ortalyǵynyń aýmaǵyndaǵy magıstraldy sý qubyryn zaqymdap aldy. Jarylǵan qubyrdy «Almaty sý» brıgadasy qalpyna keltirip jatyr, dep habarlaıdy QazAqparat tilshisi.
«Nur-Múbarak» ıslam ortalyǵynyń aýmaǵynan ótetin dıametri 800 mm sý qubyryn jeke qurylysshylar jer jumystaryn júrgizý kezinde zaqymdady. Alaıda, bul jumystardy atqarýǵa «Almaty sý» MKK-dan kelisim alynbaǵan.
«Qazir mamandar qubyrdy qalpyna keltirip jatyr. Sol sebepti, Seıfýllın – ál-Farabı – Sátbaev – Hodjanov kósheleriniń boıynda ornalasqan úıler men ǵımarattarǵa sýyq sý berý shekteldi», – dep habarlady «Almaty sý» MKK baspasóz qyzmetinen.
Kompanııa málimetinshe, jóndeý jumystary keshke deıin jalǵasady. Sýyq sý saǵat 18.00-de beriledi.
