Almatyda qurylys jumystarynan soń ýchaskeni jınamaǵan merdiger kompanııa jaýapqa tartyldy
ALMATY. QazAqparat – Almatyda Áýezov aýdany Lodygın kóshesiniń turǵyndary «Nur Otan partııasynyń Almaty qalalyq fılıalyna shaǵym túsirdi, dep habarlaıdy QazAqparat tilshisi.
Jol tósemi men trotýarlardy aýystyrý jumystaryna baılanysty qolaısyzdyqtar, atap aıtqanda, zaǵıp jáne nashar kóretin balalarǵa arnalǵan № 4 mektep-ınternatyna qarama-qarsy paıda bolǵan aldyńǵy asfalt jamylǵysynyń bıik úıindileri sebep boldy.
«Uzaq jóndeý jumystary júrip jatyr. Munda zaǵıp jáne nashar kóretin balalar oqıdy, barlyǵyna júrý óte qıyn», - deıdi aýdan turǵyny Rýslan Ivanov.
«Nur Otan» partııasy Almaty qalalyq fılıaly Partııalyq baqylaý komıssııasynyń ınspektory Erjan Jumaǵulov pen monıtorıng tobynyń qatysýshylary birqatar mańyzdy eskertýlerdi anyqtady. Mysaly, jol tósemin frezerlegennen keıin jol ýchaskesi der kezinde retke keltirilmegen.
Al qalǵan artyq topyraq pen asfalt kesekteri mamandandyrylǵan mekemeniń janynda eki aptadan astam ýaqyt jatqan.
«Sıgnaldyq lentalardyń bolmaýynan jaıaý júrginshiler ártúrli dárejedegi jaraqat alýy múmkin»,- dedi Jumaǵulov ýchaske bastyǵyna.
Qalalyq Mobıldilik basqarmasy kóshe jol jelisin damytý bóliminiń basshysy Nurzat Ordabaev jýrnalısterge jóndeý jumystary barysynda merdigerdiń jibergen zańbuzýshylyqtaryn rastady. Uzyndyǵy 750 metr Lodygın kóshesindegi jol jóndeý jumystary Şepkın kóshesinen Pıatnıtskıı kóshesine deıin sozylǵan.
Tehnıkalyq keńestiń qorytyndysy boıynsha barlyq anyqtalǵan eskertýlerdi joıý jáne jumystardy osy aıdyń sońyna deıin aıaqtaý týraly sheshim qabyldandy.
