Almatyda qurylys nysandaryna monıtorıng júrgizýdiń ınteraktıvti kartasy jasalady

Qalalyq josparlaý jáne ýrbanıstıka basqarmasynyń málimetinshe, ınteraktıvti rejımde kóppáterli turǵyn úı keshenderi men jeke turǵyn úı qurylystary týraly aqparat alýǵa bolady.

Qazirgi kezde ınteraktıvti kartany ázirleý úshin 94 kóppáterli turǵyn úı kesheni boıynsha aqparat jınaqtaldy.

Bazada myna málimetter bolady:

– jobanyń ataýy;

– qurylys nysanynyń túri, kóppáterli turǵyn kesheniniń nemese jeke úıdiń qurylysy;

– kadastrlyq nómiri;

– kelisilgen eskızdik jobalar týraly málimet;

– AJT alǵandyǵy týraly málimet;

– qurylysty salýshynyń ataýy;

– qurylystyń bastalǵany jáne qashan iske qosylatyny týraly málimet;

– avtolyq/tehnıkalyq qadaǵalaý;

– nysannyń qaı aımaqta ornalasqany týraly málimet;

– qarjylandyrý kózi;

– qansha qabat;

– salynatyn alańy m2;

– ǵımarat sany;

– páter sany;

– qurylystyń barysy týraly fotosýretter.

Búginde ınteraktıvti kartany toltyrý úshin jeke turǵyn úı qurylysy týraly aqparat jınalýda. Keıin málimetter bazasy aı saıyn onlaın rejımde jańaryp otyratyn bolady.

Basqarma ınteraktıvti kartanyń ınterfeısin rettep, olardy taqyryptar boıynsha qajetti málimettermen toltyrdy. Aqparatty jeńil ári tez qabyldaý úshin dızaıny jasalyp jatyr. Sondaı-aq barlyq nysandardyń «qurylys pasporty» jasalyp, olardy geoportaldan júkteý múmkindigi qamtamasyz etilgen.

Budan bólek, qurylysqa monıtorıng júrgizýdiń ınteraktıvti kartasy jasaldy. Osynyń arqasynda azamattar men developerler qurylys qarqynyn mobıldi qurylǵylar jáne kompıýterler arqyly baqylaı alady.

Qabyldanatyn sheshimderdiń tıimdiligin arttyrý úshin jobalardy basqarý tetikteri engizilýde. Faıldar men jobalyq qujattamalardy bir ortalyqta saqtaý úshin GantPro online-platformasy testilik rejımde jumysyn bastady. Jobalyq tásildi qoldaný «problemalyq» obektilerdi jedel anyqtaýǵa jáne shuǵyl sharalardy qoldanýǵa kómektesedi.