Almatyda qurylys kompanııalaryna talap kúsheıtiledi
ALMATY. QazAqparat- Almaty ákimi Baqytjan Saǵyntaev halyqqa esep berý kezdesýinde qalada turǵyn úı keshenderin salatyndarǵa qatań talap qoıylatynyn aıtty, dep habarlaıdy QazAqparat tilshisi.
Onyń aıtýynsha, Almatyda turǵyn úı keshenin salýshylarǵa balabaqsha men mektep salý mindetteledi.
«Endi ákimdikke josparymen kelgen kásipkerlerden talap etemiz. Eger josparǵa mektep kirmese, onda qurylysqa ruqsat etilmeıdi. Bizdiń talap - mektepterge, balabaqshalarǵa jáne shaǵyn ambýlatorııalarǵa degen suranysty qanaǵattandyrý. Tek osy qaǵıdaǵa saı sheshim shyǵaramyz», - deıdi ákim.
Bul prıntsıp qazirdiń ózinde qoldanylady. Mysaly, Alataý aýdanynda 22 úıden turatyn «Mádenıet» turǵyn úı kesheni salynyp jatyr. Onda jobaǵa saı 120 oryndyq balabaqsha qurylysy qarastyrylǵan.
«Qaırat» shaǵyn aýdanynda № 41 úıdiń qurylysy bastaldy, jobada 1 500 oryndyq mektep, 260 oryndyq balabaqsha men emhana bar.
«Demalys oryndaryn jaqsartý jáne qurý maqsatynda aýlalar jóndelýde, oıyn jáne sport alańdary qurylýda. Mysaly, M.Áýezov aýdanynda 2020 jyly 205 aýla, 9 skver jóndeldi, 5 bos ýchaske, 2 jaǵalaý aımaǵy abattandyryldy, 10 shaǵyn aýdandaǵy jaıaý júrginshiler aımaǵy jóndelýde. Sondaı-aq, bul aýdanda bir kezderi qaraýsyz qalǵan ýchaskelerde skverler men kósheler boıynda 10 sport alańy salyndy, aýlalardy jóndeý kezinde taǵy 50 alań quryldy», - deıdi Baqytjan Saǵyntaev.
