Almatyda qurylys bazarynan órt shyqty
ALMATY. QazAqparat – Almatyda «Baqorda» saýda úıinde býtıkter órtendi, dep habarlaıdy QazAqparat tilshisi.
Almaty qalasynyń tótenshe jaǵdaılar departamentiniń málimetinshe saýda býtıkterinde 80 sharshy metr jer órtendi.
«Búgin saǵat 13:56-da Alataý aýdany, Yrysty kóshesi, 46/2A meken jaıy boıynsha qurylys bólshekterin satatyn saýda býtıkterinde aýdany 80 sharshy metr órt shyqty. Ol 5 mınýttyń ishinde aýyzdyqtalyp, saǵat 14:25-te tolyq sóndirildi. Zardap shekkender joq. Qabyldanǵan jedel sharalar órttiń «Baqorda» saýda úıine taralýyna jol bermedi»,- dep habarlady qalalyq TJD-da.
Bolǵan órttiń vıdeosy jelide tarady.
Eske salsaq, buǵan deıin Almaty mańynda kólik jýý ortalyǵy órtenip, 2 adam reanımatsııaǵa túsken bolatyn.
Sondaı-aq, Almatyda jyl basynan beri turǵyn úı sektorynda 325 ret órt shyqqanyn habarlaǵan bolatynbyz.
