Almatyda qurylys alańynda kran qulady
ALMATY. QazAqparat- Almatyda qurylys alańynda munara krany qulady, dep habarlaıdy QazAqparat tilshisi.
Onyń vıdeosy áleýmettik jelide tarady.
Almaty qalalyq ónerkásiptik qaýipsizdik departamentiniń málimetinshe, tótenshe jaǵdaı Túrksib aýdanynda bolǵan.
«Jas qanat» shaǵynaýdanynda ornalasqan «Rembýs» JShS qurylys obektisinde salynyp jatqan 9 qabatty ǵımarattyń parapetine KB-308 relsti munara krany qulady. Qaza bolǵandar men zardap shekkender joq. Krannyń menshik ıesi - «KBK» JK. Shart boıynsha kran «Melıorator» JShS-ne jalǵa berildi.
Departament taratqan málimetke sáıkes, byltyr naýryz aıynda «Jetysý ónerkásiptik qaýipsizdik» JShS krannyń múmkindigin, ony odan ári paıdalanýdy anyqtaýǵa saraptama júrgizgen.
«Sóıtip, krandy paıdalaný merzimi 2023 jyldyń naýryzyna deıin uzartyldy. Bıylǵy 11 aqpanda «Melıorator» JShS hatyna sáıkes krandy QR TJM ónerkásiptik qaýipsizdik komıtetiniń Almaty qalasy boıynsha departamentiniń mamany iske qosty. Qazirgi ýaqytta departamentte munara kranynyń qulaýyn tekserý jónindegi komıssııa quryldy. Tergeý nátıjesin qosymsha habarlaımyz»,- dep atap ótti vedomstvadan.
Eske salaıyq, qańtar aıynda «Taýgúl-1» shaǵynaýdanynda qurylys krany qulap, bir adam qaza tapqan bolatyn.
