Almatyda kýrsanttar belsendi daýys berýde

ALMATY. QazAqparat - Almatyda Radıoelektronıka jáne baılanys áskerı ınjenerlik ınstıtýtynyń kýrsanttary saılaýda belsendilik tanytty, dep habarlaıdy QazAqparat tilshisi.

Tańerteńnen bastap ár kýrsant óz quqyǵyn paıdalanyp, áskerı oqý ornynda ornalasqan saılaý ýchaskesinde daýys berdi.

«Prezıdent saılaýy - Qazaqstan úshin asa mańyzdy tańdaý. Elimizdiń bútindigi men tutastyǵy, bolashaǵy saılaýǵa baılanysty. Biz bolashaq ofıtser retinde jańa prezıdentimizdiń saıasatyn qoldap, elimizdiń kórkeıýine úles qosýǵa daıynbyz», - dedi kýrsant Rústem Jádiger.

Áskerı ınstıtýttyń turaqty quramy men olardyń otbasy músheleri de óz konstıtýtsııalyq quqyqtaryn paıdalanyp, daýys berdi.

Barlyǵy ınstıtýt atynan saılaý ýchaskesine 1 500 adam keledi.

Jalpy alǵanda búgin Almatyda 563 saılaý ýchaskesi jumysyn bastady. Qala boıynsha búginde 1 mıllıon 130 myń 792 saılaýshy tirkelgen. Ýchaskeler turaqty jáne tasymaldanatyn saılaý jáshikterimen, qajetti aqparattyq materıaldarmen qamtamasyz etilgen.

Eske sala ketsek, búgin Qazaqstan Prezıdentin kezekten tys saılaý bastaldy. QR Prezıdentiniń kezekten tys saılaýynda el ishinde jáne shet elderde 9 968 daýys berý ýchaskesi jumys isteıdi.

Saılaý týraly Konstıtýtsııalyq zańǵa sáıkes, daýys berý ýaqyty standartty (saǵat 7.00-20.00 aralyǵy) bolady.