Almatyda «Qurmet kúni» ótip jatyr
ALMATY. 1 maýsym. QazAqparat /Erlik Erjanuly/ - Búgin Almatyda «Qurmet kúni» - jastarǵa úlgi ónege kórseteıik» degen aıdarmen Halyq qaharmany, general-leıtenant Baqytjan Ertaevpen kezdesý ótip jatyr.
Sharany «Bolashaq» respýblıkalyq qozǵalysy uıymdastyrǵan.
«Qazaq halqynda eren erligimen eline úlgi-ónege bolǵan batyrlar óte kóp. Osy kúnge deıin jastarymyzdyń oı-sanasyn batyrlyqqa, minezin qaısarlyqqa, kókiregin qaıtpastyqqa, ózin aqyldylyqqa tárbıeleýde birden-bir úlken ról atqarǵan osy - batyrlardyń ómiri. Alaıda kóp jaǵdaıda shynaıy ómirdegi batyrlar umyt qalyp jatady. Sondyqtan jastarymyzdyń oı-sanasy kosmopolıttenip bara jatqan sııaqty», - deıdi «Bolashaq» qoǵalysynyń jastar qanatynyń tóraǵasy Elnur Beısenbaev.
Onyń aıtýynsha, qazirgi zamannyń batyrlary el ishinde jeterlik. Solardyń mereıin asqaqtatar «Qurmet kúni» sııaqty arnaıy kún qajet. Bul kúni jastardy osyndaı azamattarmen kezdestirip, olardyń kórgen bilgenin urpaqqa ósıet etip aıtyp berý paryz. «Osyndaı qaharmandarymyzdyń arqasynda beıbit kúnge jetip, tynysh uıyqtap júrgenimizge taǵzym etý qajet. Sol batyrlarymyzdyń kórsetken erligin estip ósken jas urpaq, bolashaqta sol azamattyń jolyn qýatyn shyǵar degen úmitimiz mol», - deıdi E. Beısenbaev.
