Almatyda qurbandyq shalatyn orynda sanıtarlyq talaptar óreskel buzylǵan
ALMATY. QazAqparat- Almatydaǵy « Kamenka» bazarynda qurbandyqqa soıylǵan maldyń qany men bas-sıraq, ishek-qarynynan aıaq alyp júrý múmkin bolmady, dep habarlaıdy QazAqparat tilshisi.
Onyń vıdeosy áleýmettik jeli men messendjerler arqyly tarap jatyr.
Vıdeo avtorynyń aıtýynsha, bul «Kamenka» bazary. Kelýshiler de, qasapshylar da eshqandaı sanıtarlyq talapty saqtamaǵan.
Beınejazbadan edende shashylyp jatqan qoıdyń bas-sıraǵy men ishek-qarynyn kórýge bolady.
Osy jaǵdaıdy Aýyl sharýashylyǵy mınıstrliginiń Veterınarııalyq baqylaý jáne qadaǵalaý komıtetiniń Almaty qalasy boıynsha aýmaqtyq ınspektsııasynyń bólim basshysy Nurlan Táshimov túsindirdi.
«Ókinishke oraı, osyndaı jaǵdaıdyń bolǵany ras. Bul oqıǵa 9 shilde kúni «Kamenka» bazarynda boldy. Aıt namazynan keıin adamdar jappaı qurbandyqqa shalatyn maldaryn alyp ishke enip ketken. Mamandar basynda jaǵdaıdy baqylaı almaı qaldy. Ol jerge veterınarııalyq baqylaý jáne qadaǵalaý komıtetiniń Almaty qalasy boıynsha aýmaqtyq ınspektsııasynan eki adam bektilgen. Keıin, mamandar ereje buzǵandardy toqtatyp qoıyp, jınap, tazalatqyzyp baryp, qaıta ruqsat berdi. Qurban aıt merekesi aıaqtalǵanan keıin jaýapty adamdarǵa shara qoldanylady»,- dedi ol.
Aıtýynsha, keler jyly bul bazarǵa mal soıýǵa ruqsat berilmeýi múmkin.
«2023 jyly atalǵan bazarǵa Qurban aıt meıramy kezinde mal soıýǵa ruqsat bermeý máselesin kóteremiz. Sebebi, bazar ákimshiligi uıymdastyrý jumysyn júrgize almady»,-deıdi Nurlan Táshimov.
Aıta keteıik, megapolıste qurbandyq shalýǵa 13 oryn belgilengen edi.
