Almatyda Qurban aıt qalaı uıymdastyrylady

ALMATY. QazAqparat - Almatynyń bas sanıtarlyq dárigeri Jandarbek Bekshın onlaın brıfıng barysynda aldaǵy Aıt kezinde qurbandyq shalý rásimi qalaı ótetinin aıtty, dep habarlaıdy QazAqparat tilshisi.

Onyń aıtýynsha, Qurban aıt merekesi byltyrǵy formatta, ıaǵnı onlaın rejımde ótedi.

«Byltyr biz alǵash ret qurban aıtty onlaın rejımde ótkizdik. Ótken jyldyń tájirıbesi sadaqanyń da, qurban shalýdyń da bolǵanyn kórsetti. Onlaın rejıminde ótkizýge bolady. Qurban-2021 saıty arqyly sadaqa, sondaı-aq «qurban shalýdy» uıymdastyrýǵa qarajat túsedi. Qurbandyqqa shalynǵan mal Almaty oblysynyń Qarasaı aýdanyndaǵy arnaıy orynda soıylady», – dedi ol.

«Byltyr bári uıymdasqan túrde ótti. Din isteri basqarmasy, Almaty múftıimen birlesip, byltyrǵy tájirıbeni talqylaımyz», - dedi qalanyń bas sanıtar dárigeri.

Aıta keteıik, 2021 jyly Qurban aıt 20-22 shilde aralyǵynda ótedi. Qurban aıt Oraza aıttan 70 kúnnen keıin bastalyp, 3 kúnge sozylady.