Almatyda qýrap ketken qaraǵaı men shyrsha aǵashtaryna qatysty ákimdik túsinik berdi
ALMATY. QazAqparat - Almaty qalasynyń jasyl ekonomıka basqarmasy qaraǵaılar men shyrshalardyń nege qýrap jatqanyn túsindirdi, dep habarlaıdy QazAqparat tilshisi.
Áleýmettik jeli qoldanýshylary Bostandyq aýdanynyń ákimdiginen Jarokov kóshesiniń boıynda soltústik baǵytta, Ótepov kóshesiniń joǵary jaǵynda qýrap jatqan shyrshalarǵa nazar aýdarýdy surady.
Qalanyń jasyl ekonomıka basqarmasynyń málimetinshe, qylqan japyraqty aǵashtar birneshe sebeptermen qýrap ketti.
«Qys mezgilinde kóktaıǵaqqa qarsy materıaldar qoldanylady, bul qylqan japyraqty aǵashtardyń tamyr júıesine keri áser etip, jazda kebýine ákeldi. Sondaı-aq osy jyldyń kókteminde aýa raıy qubylmaly boldy. Aýa temperatýrasy kúrt ózgerdi. Sol kezde qylqan japyraqty aǵashtar kúnge kúıip qaldy. Jarokov kóshesinde qylqan japyraqty aǵashtardyń tyǵyz ornalasqany baıqalady. Bul ósimdikterdiń aýa almasýynyń buzylýyna ákeledi. Qylqan japyraqty aǵashtardyń jáne jol boıynda ósetin basqa aǵash túrleriniń jaǵdaıyn qalpyna keltirý úshin túrli tynaıtqyshtar qoldanylatyn bolady», - dep jaýap berdi basqarmadaǵylar.
