Almatyda Quran oqýdan jarys ótýde
ASTANA. QazAqparat - Elimizdiń barlyq meshitterinde «Senderdiń jaqsylaryń Qurandy úırengenderiń jáne ony úıretkenderiń» degen hadıske amal etýshilerdiń qatary kóbeıip keledi.
Búgin osy maqsatta kúlli musylman jurtynyń merekesi Ramazan aıy qarsańynda Almaty Ortalyq meshitinde Quran jarysy uıymdastyrylýda. Bul jarysta 15 jasqa deıingi 60-tan astam bala baq synap jatyr, dep habarlaıdy muftyat.kz. Solardyń arasynda musylmannyń Qasıetti haq kitabyn yrǵaqqa keltirip oqyǵan 5 jasar Mustafa da bar. 4 jasynan bastap Qurandy ákesiniń úıretýimen jattaǵan ol 75 súreni jańylmaı aıtady eken.
Bes adamnan turatyn qazylar alqasy árbir talapkerlerdi eki túrli synnan ótkizedi. Demek, árkim ózi daıyndalyp kelgen súreni maqamyna keltirip jáne Qurannyń 30-shy parasyn jatqa oqyp berýi kerek.
Baıqaý sońynda jeńimpazdarǵa júlde taratylyp, barlyq qatysýshylarǵa alǵys hattar men yntalandyrý syılyqtary tabystalady.
1-shi orynǵa - 75 000 teńge, 2-shi orynǵa - 55 000 teńge, úshinshi orynǵa 35 000 teńge beriledi. Sondaı-aq bes yntalandyrý syılyǵy retinde elektrondy Quran úlgileri tabystalady.
