Almatyda qýraǵan shóp órtenip jatyr
ALMATY. QazAqparat - Alataý aýdanynda jalpy aýmaǵy 1000 sharshy metr bolatyn qurǵaq shóp órtenip, jeke úıge jaqyn ornalasqan sharýashylyq qurylysyna tarady, dep habarlaıdy QazAqparat tilshisi.
«Ójet» jáne «Shalkóde» yqshamaýdanynda jalpy kólemi 1000 sharshy metr bolatyn qurǵaq shóp órtendi. Órt jeke úıge jaqyn sharýashylyq qurylysyna tarady. Ony joıýǵa 7 tehnıka men jeke quramnan 20-dan astam qyzmetker jiberildi. Órttiń sebebi - ashyq ot kózi», - deıdi Almaty qalalyq TJD baspasóz qyzmeti.
Sondaı-aq, 6 sáýir kúni saǵat 19:50-de Naýryzbaı aýdanynda da qurǵaq shóp órtengen.
«Ǵalamat» shaǵyn aýdanynda taý bókterinde qýraǵan shóp órtenip jatty. Tehnıkanyń kirýi qıyn bolýyna baılanysty órt sóndirýshiler oqıǵa ornyna jaıaý kóterildi. «Ermak» aspaly órt sóndirgishteri, shantsty quraldar (shartyldaqtar, kúrekter) paıdalanyldy. Qoldanylǵan sharalarmen tutaný 20:28-de joıyldy. Qaza bolǵandar men zardap shekkender joq», - dep habarlady vedomstvadan.
Departament qala turǵyndary men qonaqtaryn dalada ot jaǵýdan, temeki shegýden jáne qurǵaq shóp pen orylǵan shópti órteýden bas tartýdy suraıdy.
«Kináli adamdar ákimshilik, al aýyr zardaptar týyndaǵan jaǵdaıda qylmystyq jaýapqa tartylady. 30 naýryzdan bastap órt sóndirýshiler jalpy aýdany 8,5 myń sharshy metr bolatyn 25 órt jaǵdaıyna shyqty», - dep eskertedi TJD.
Eske salaıyq, Shyǵys Qazaqstanda sáýir aıy bastalǵaly 6 dala órti sóndirildi.
