Almatyda qýraǵan alma baqtarynyń ornyna 10 myń túp aport kósheti otyrǵyzylady
ALMATY. QazAqparat - Almatynyń taý bókterinde qýrap jatqan alma baqtarynyń ornyna 10 000 túp aport almasynyń kósheti otyrǵyzylady, dep habarlaıdy «QazAqparat» HAA tilshisi.
Kóshetter 70-jyldardyń basynda ósirilgen qýraǵan alma baqtarynyń ornyna otyrǵyzylady. Olar Baǵanashyl, Býtakovka aýdany men Almaarasan shatqalynda ornalasqan. 
«Baǵanashyldaǵy baqta qazir 3200 qýraǵan aǵash bar. Bul - jabaıy baq, onyń fıtosanıtarlyq jaǵdaı óte nashar. Aǵashtardyń 90%-y tsıtoporozǵa jáne bakterıaldyq kúıikke shaldyqqan. Shara qoldanbasaq, baqtan túk qalmaıdy. Ol joıylý ústinde», - dedi agronom Samır Ismaılhanov. 
Mamandar bul máseleni sheshý úshin baqty tolyqtaı jańartý kerek deıdi, ıaǵnı qýraǵan aǵashtardy súrip tastap, ornyna jańa kóshetter otyrǵyzý qajet.
Bul máselege Qoǵamdyq keńes múshesi, «Alma Qala» qozǵalysynyń uıymdastyrýshysy Beknur Qısyqov pikir bildirdi. 
«Aǵashtardy kesý týraly árbir fakt maǵan aýyr tıedi. Biz týyp-ósken jasyl qala kóptegen baqtarynan aıyryldy. Men eski aǵashtardy súrip tastaý úshin mańyzdy sebep kerek dep esepteımin. Orman-patologııalyq saraptama qujattaryn tyńǵylyqty qarap shyqtym. Árbir aǵash nómirlengen. Bul iske bilek sybana kiriskenderi baıqalady. Alǵashqy kóshetter otyrǵyzylyp jatyr. Adamdardyń qyzyǵýshylyqtaryn is júzinde baıqap otyrmyn», - dedi Beknur Qısyqov. 
Ol ekologtar men jurtshylyqty baqtardyń ahýalyn baqylaýǵa jáne múmkindiginshe kútim jasaýǵa kómektesýge shaqyrady.
