Almatyda quny 24,1 mlrd teńge bolatyn 14 jobany iske qosý josparlanýda
ALMATY. QazAqparat– Almaty ákimi Baqytjan Saǵyntaev ındýstrıaldy aımaqtaǵy iske qosylatyn jobalardyń barysyn tekserdi, dep habarlaıdy QazAqparat tilshisi.
Almatydaǵy ındýstrıaldy aımaqtyń jalpy kólemi 490 ga, onyń ishinen jobalarǵa 326 ga qarastyrylǵan. Búgingi kúni ınvestıtsııalyq jobalardy júzege asyrý úshin 212 ga bólingen. 43 kompanııa rezıdent bolyp tabylady, onyń 9-na sheteldikter qatysady.
Qala ákimi Baqytjan Saǵyntaev iske qosý-retteý jumystarynyń jáne ónim shyǵarýdyń protsessterimen tanysty, júzege asyrylatyn jobalardyń megapolıstiń ekonomıkasy úshin mańyzdy ekenin atap ótti. Sonymen qatar ol ındýstrıaldy aımaqtyń áleýeti qajet ári básekege qabiletti jańa óndiris oryndaryn qurýǵa múmkindik beretinin tilge tıek etti. Mundaǵy basty talap – óndiris ekologııasy, energııanyń tıimdiligi, zamanaýı tehnologııany utymdy paıdalaný jáne óndiris protsessterin joǵary deńgeıde tsıfrlandyrý.
Aǵymdaǵy jyly ındýstrıaldy aımaqta segiz jańa joba iske qosyldy. Shilde aıynda «KazTigerTape» JShS jobalyq qýaty jylyna 1250 tonna ónim shyǵaratyn skotch pen streıch-qabyǵyn shyǵaratyn zaýyty paıdalanýǵa berildi. Bul jobanyń quny — 382 mln teńge, jańadan 50 jumys orny ashyldy.
Qarasha aıynda eki zaýyt iske qosyldy. Alǵashqysy — «ASSET» JShS polımer buıymdaryn shyǵaratyn zaýyty, jobalyq qýaty 315 km qubyr shyǵarý. Munda da 50 jumys orny quryldy. Investıtsııa kólemi — 421,5 mln teńge. Ekinshisi «ENKO» JShS jylýmen – sýmen qamtý buıymdaryn shyǵaratyn zaýyty, onyń jobalyq qýaty boıynsha jylyna 23800 ónim shyǵarylady. Jobanyń quny – 800 mln teńge, 64 jumys orny ashylǵan.
Qazirgi ýaqytta ındýstrıaldy aımaqta paıdalanýǵa beriletin bes zaýytty iske qosý jáne olardyń óndiris protsessterin retke keltirý jumystary júrýde, munda 1300-den astam jańa jumys oryndary ashylady.
Sonymen qatar, «Eıja Stıl Paıp Korporeıshn» JShS úlken dıametrli dánekerlengen bolat qubyrlaryn shyǵaratyn zaýytty iske qosady, ol jylyna 100 myń tonna qubyrlar óndiredi, 304 jańa jumys oryndary qurylatyn bolady.
«Tehnovıd» JShS zaýytynda energııalyq jaǵynan tıimdi qasbetter shyǵarý jolǵa qoıylǵan. Munda 80 jumys orny ashylady. Onyń jobalyq qýaty – jylyna 520 myń sharshy metr sáýlet qasbetterin shyǵarý.
Kópten kútken óndiris oryndarynyń biri — «Hyundai Trans Kazakhstan» JShS jeńil kólikter shyǵaratyn zaýytynyń qurylysy. Zaýyttyń jobalyq qýaty – jylyna 45 myń avtomobıl shyǵarý. Munda 700 jumys orny qurylatyn bolady. Taıaý ýaqytta munda alǵashqy testilik avtomobıl shyǵarylady. Keler jyly zaýyttyń ekinshi kezegi iske qosylady, sonyń arqasynda óndiristi shekteý shamamen 50%-dy quraıtyn bolady.
Taǵy bir óndiris orny – «MPZ Bıjan» JShS et ónimderi men jartylaı fabrıkattardy shyǵarady. Zaýyttyń jyldyq qýaty — 3,5 myń tonna. Munda 250 jumys orny ashylady. «Álmerek» JShS birettik medıtsınalyq ónimderdi shyǵaratyn zaýytty iske qosady. Onyń jyldyq qýaty – 29 mln dana. Munda 50 jumys orny ashylady.
2020 jyly ındýstrıaldy aımaqta jalpy quny 24,1 mlrd teńge bolatyn 14 jobany iske qosý josparlanǵan, sonyń arqasynda 1400 jańa jumys oryndary ashylatyn bolady.
