Almatyda kúnine 50 naýqas koronavırýspen aýrýhanaǵa jatqyzylady – Narıman Tabynbaev
ALMATY. QazAqparat - Almatyda kúnine COVID-19 aýrýymen 50 naýqas aýrýhanaǵa jatqyzylady. Bul týraly qalalyq qoǵamdyq densaýlyq saqtaý departamentiniń bastyǵy Narıman Tabynbaev onlaın brıfıngte aıtty, dep habarlaıdy QazAqparat tilshisi.
«Qaladaǵy epıdemıologııalyq jaǵdaı turaqty. Biz koronavırýspen kúreste júıeli sheshimder men tıimdi tásilderdi jedel júzege asyra aldyq. Qazir barlyq deńgeıde aýqymdy jumystar júrgizilýde. Degenmen, sońǵy ýaqytta jiti respıratorlyq aýrýlarmen jáne tumaýmen aýyratyndar sanynyń artýy, sondaı-aq COVID-19 boıynsha statıstıka birshama irkilis týdyrýda. Biz «sary aımaqta» turaqty turmyz jáne koronavırýsqa shaldyqqandar sany kún saıyn 90 adamnan tómen túspeıdi. Sonymen qatar, KVI dıagnozy bar patsıentterdiń sany ósýde, ıaǵnı, kovıdti pnevmonııa. Birinshiden, biz bul kórsetkishterdi vırýs ınfektsııalarynyń maýsymdyq sharyqtaý shegimen baılanystyramyz. Jalpy, qalanyń densaýlyq saqtaý júıesi COVID-pen kúresýge beıimdelgen jáne ártúrli stsenarıılerge daıyn»,- deıdi qalanyń bas dárigeri.
Almatyda pandemııa bastalǵaly beri KVI-diń 19 138 jaǵdaıy tirkeldi. Sońǵy táýlikte 105 jańa jaǵdaı anyqtaldy.
«Koronavırýspen kúresýge baǵyttalǵan ýaqtyly qabyldanǵan sheshimder óz nátıjesin beredi. Infektsııalyq statsıonarlardyń júktemesi azaıdy, búginde 1 261 tósek jumys isteıdi, bul rette jalpy sanynyń 68% - y nemese 5 145 tósek rezervte tur. Qazirgi ýaqytta táýligine orta eseppen 50-ge deıin patsıent aýrýhanaǵa jatqyzylady»,-dedi ol.
