Almatyda kúnine 15 onkologııalyq naýqasqa ota jasalady
ALMATY. QazAqparat - Almaty onkologııalyq ortalyǵynyń dárigerleri koronavırýs pandemııasy kezinde qabyldaýdy, dıagnostıkany, emdeý júrgizýdi jalǵastyryp kúnine kem degende 15 ota jasaıdy, dep habarlaıdy QazAqparat tilshisi.
Máselen, birinshi toqsannyń qorytyndysy boıynsha Almatynyń onkologııalyq ortalyǵynda barlyǵy 4 myńnan astam onkologııalyq naýqas emdelip shyqty, bul degenimiz ótken jyldyń birinshi toqsanymen salystyrǵanda 14,9%-ǵa kóp.
Emdeý aýqymynyń artýy arqasynda ólim-jitim azaıyp, patsıentterdiń ǵumyry uzarýda.
Naýqastarǵa 600-ge jýyq ota jasaldy, 3549 patsıent hımıoterapııa aldy, 200 patsıent sáýlelik terapııamen emdeldi.
Almatyda úsh aı ishinde alǵashqy qaterli isiktiń belgileri baıqalǵan 1092 naýqas tirkeýge alyndy. Tek onkologııalyq skrınıngterdi júrgizý barysynda 46 qaterli isik belgileri erte anyqtaldy
Onkologııalyq ortalyqtyń bas dárigeri Nursultan Іzmaǵambetovtyń aıtýynsha, Almatyda aýrýdyń qurylymy boıynsha sút beziniń qaterli isigi 1-orynda (15,8%), 2-orynda - kolorektaldy qaterli isik (9,6%), 3-orynda -ókpe isigi (7,7%).
Jyl basynan beri ortalyqta 207 halyqaralyq telepatologııa júıesi arqyly isiktiń bıoúlgisi boıynsha telekeńes, 220 molekýlıarlyq-genetıkalyq zertteý, 741 KT jáne MRT dıagnostıkalyq zertteýi júrgizildi.
Mamandar halyqty jyl saıynǵy skrınıngten ótýge shaqyrady.
«Skrınıngten ótý erte satydaǵy sımptomsyz obyrdy erte anyqtaýdyń tıimdi tetigi bolyp tabylady. Patsıentti emdeý neǵurlym erte bastalsa, soǵurlym onyń tolyq saýyǵýǵa múmkindik bar», - dedi Nursultan Іzmaǵambetov.
Skrınıngtik tekserýden ótýdiń nátıjesinde sońǵy 3 jyldyń ishinde sút beziniń qaterli isigi boıynsha 200, jatyr moınynyń qaterli isiginiń 40 jaǵdaıy jáne 50-den astam tik jáne toq ishektiń qaterli isikteri anyqtaldy.
Osylaısha, barlyq joǵaryda atalyp ótken anyqtalǵan qaterli isiktiń 90%-y aýrýdyń 1-2 satysynda, ıaǵnı emdeýdiń tıimdiligine jáne tolyq saýyǵýǵa qoljetkizýge bolady.
