Almatyda kún saıyn myńnan astam zeınetker «Belsendi uzaq ómir» ortalyǵyna barady
ALMATY. QazAqparat- Almaty ákimdigi egde jastaǵy adamdardyń ómir súrý deńgeıi men sapasyn arttyrýǵa qamqorlyq jasaıdy. 2018 jyldan bastap megapolıste «Belsendi uzaq ómir» jol kartasy júzege asyrylyp jatyr. Joba aǵa býyn ókilderi arasynda úlken suranysqa ıe.
Belsendi uzaq ómir súrýdiń 9 ortalyǵynda qatysýshylar pikirlesterin tabady, ýaqytyn qyzyqty ótkizedi, jańa nárseni úırenedi. Bul týraly Almaty qalasy Áleýmettik ál-aýqat basqarmasy basshysy orynbasarynyń mindetin atqarýshy Jánibek Qarataev aıtty, dep habarlaıdy QazAqparat tilshisi.
«Búginde qalada toǵyz Belsendi uzaq ómir súrý ortalyǵy qyzmet kórsetedi, ıaǵnı mundaı ortalyqtar barlyq aýdanda bar. Olarǵa kún saıyn 1 myńnan astam adam keledi», - dedi Áleýmettik ál-aýqat basqarmasy basshysynyń orynbasary.
Onyń aıtýynsha, ortalyqta qart adamdarǵa túrli qyzmetter men demalys túrleri usynylady. Bul ómirlik tonýs pen densaýlyqty saqtaý úshin dárigerlerdiń keńesteri, psıhologtarmen áńgimeler, kýrstarda oqytý, dene shynyqtyrý.
Zeınetkerler qolóner, mýzyka jáne bı, qazaq jáne aǵylshyn tili sabaqtaryna, kompıýterlik kýrstarǵa qatysa alady. Olar úshin murajaılarǵa, teatrlarǵa, kórmelerge, kınolarǵa barý uıymdastyrylyp, merekeler ótkiziledi.
Sonymen qatar, zeınetkerler bos ýaqyttaryn tıimdi ótkizedi. Shahmat, nardy, domıno oınaıdy. Sýret salý, keskindeme jáne grafıka, ósimdik sharýashylyǵy, qolóner, sondaı-aq jadyny nyǵaıtý tehnıkasy bar. Ortalyqtardaǵy barlyq shara sanıtarlyq-epıdemıologııalyq normalardy saqtaı otyryp júrgiziledi.
«Shamamen 13 500 qart almatylyq emdik ıogamen, skandınavııalyq júrispen, emdik dene shynyqtyrýmen aınalysady. Bul qyzmet túri ásirese zeınetkerler arasynda tanymal. Zeınetkerler keńes alý úshin gerontolog, kenezıolog-psıhologtarǵa júgine alady», - dedi Jánibek Qarataev.
Áleýmettik ál-aýqat basqarmasynyń ókili jergilikti atqarýshy organdardyń qoldaýymen bıyl 500-den astam zeınetker úshin Esik, Qapshaǵaı qalalaryna, Oı-qaraǵaıǵa, Qaskeleń shatqalyna týrıstik saparlar uıymdastyrylǵanyn aıtty.
Bıyl shilde aıynan bastap belsendi uzaq ómir súrý ortalyqtarynda «qum art-terapııa» tehnıkasy kýrsy ashyldy. Bul- psıhoterapııa ádisteriniń biri. Kýrsttan elýden astam adam ótti.
