Almatyda kún saıyn 7 myń turǵyn vaktsına saldyrady

ALMATY. QazAqparat – Almatyda halyqty vaktsınalaý qarqyny kúnine jeti myńnan astam adamdy quraıdy. Bul týraly Almatynyń bas sanıtarlyq dárigeri Jandarbek Bekshın aıtty, dep habarlaıdy «QazAqparat» HAA tilshisi.

Spıker megapolıs turǵyndarynyń ımmýndyq qabaty KVI-den ujymdyq ımmýnıtetti qalyptastyrýǵa jetpeıtinin atap ótti. 6 tamyzdaǵy jaǵdaı boıynsha, vaktsınalaý qala turǵyndarynyń resmı sanynyń 41,1% kórsetti.

J. Bekshınniń aıtýynsha, bir jasqa deıingi balalardyń aýrýshańdyǵy artyp keledi. Ótken aptada 224 KVI deregi tirkelse, osy aptada 238 jaǵdaı anyqtalǵan. 14 jasqa deıingi balalar arasynda aýrýdyń tómendeýi baıqalady – ótken aptada 1 099, osy aptada - 878 bala. Jalpy KVI aýrýshańdyǵy 20-40 jas aralyǵyndaǵy jastar arasynda – 38%, 40-59 jas aralyǵynda – 25% jáne 60 jastan asqan adamdar arasynda – 20%.

Almatynyń bas sanıtarlyq dárigeri halyqtyń qandaı toptary KVI juqtyrýǵa beıim ekenin aıtty.

«Aldyńǵy 7 kúnmen salystyrǵanda sońǵy 7 kúnde ózin-ózi jumyspen qamtyǵandar arasynda – 41%, túrli JShS, JK, AQ qyzmetkerleri arasynda – 18,4%, zeınetkerler arasynda – 17,3% jáne oqýshylar arasynda – 9,2% jáne mektep jasyna deıingi balalar arasynda – 6% joǵary kórsetkish saqtalýda. Halyqtyń atalǵan sanattary KVI-men aýyrǵandardyń jalpy sanynyń 92% quraıdy jáne olardyń arasynda aldyn alý sharalaryn júrgizý qajet», - deıdi J. Bekshın.