Almatyda kún 30 gradýsqa deıin ysıdy
ALMATY. QazAqparat – Kúzdiń alǵashqy aıy ystyq bolady, aýa temperatýrasy 30 gradýsqa deıin kóteriledi, dep habarlaıdy QazAqparat tilshisi.
Sınoptıkterdiń boljamy boıynsha, ońtústik astanada kúzdiń alǵashqy aıy jyly bolady.
«14-15 qyrkúıekte Almatyda kóshpeli bult shyǵady, jańbyr jaýmaıdy. Aýa temperatýrasy túnde 13-17, kúndiz 26-30 jyly bolady.16 qyrkúıek kúni kóshpeli bult shyǵady, kúndiz jańbyr jaýady, naızaǵaı oınaıdy. Aýa temperatýrasy túnde 16-18, kúndiz 26-28 jyly bolady», - dep habarlady «Qazgıdromet» RMK.
Kásiporyn taratqan málimetterge qaraǵanda, Qazaqstannyń soltústik bóliginde kún salqyndap, jańbyr jaýady.
«Atmosferalyq frontaldy bólikterdiń áserinen QR shyǵysynda, soltústik-batysynda, ońtústik-batysynda, sondaı-aq ońtústik-shyǵystyń taýly aýdandarynda jańbyr jaýady, naızaǵaı oınaıdy.Túnde jáne tańerteń soltústik-batys jáne ortalyq aımaqtarda tuman túsedi. Soltústikte, kúndiz elimizdiń ońtústigindegi taýly aımaqtarda jel 15-20 m/s jyldamdyqpen soǵady»,- dep atap ótti sınoptıkter.
