Almatyda kúlki kúnine oraı «Tekshedegi ázil» atty kontsert bolyp ótti
ALMATY. 31 naýryz. QazAqparat /Názıra Eleýhan/ - Almatyda Abaı atyndaǵy Qazaq memlekettik akademııalyq opera jáne balet teatrynda Qazaqstan Respýblıkasy Tuńǵysh Prezıdentiniń Qory men «Rýhanı Qazyna» qoǵamdyq qorynyń uıymdastyrýymen, Halyqaralyq kúlki kúnine oraı, «Tekshedegi ázil» atty kontsert bolyp ótti.
Kórermenderdiń nazaryna alǵash ret klassıka, qazirgi zaman áýenderi, halyq mýzykalary, sondaı-aq, rok mýzykanyń úzdik týyndylary men djaz ımprovızatsııalary qosylǵan jańa dúnıeler usynylady.
Shara barysynda TOP ARCHI GROUP «TRIUMVIRAT» ishekti aspaptar úzdik tobynyń tusaýkeser rásimi jasaldy. Orkestr alǵashqy ret klassıkalyq kórkemónerdiń dástúrli sheńberinen shyǵyp, oryndaýshylyq sheberliktiń túrli sıpattaryn biriktirdi.
«Toptyń aty «úzdik ishekti top, úsh janrdyń - klassıka, estrada, halyq mýzykalarynyń qosylýy» degen maǵynany bildiredi. Bul orkestrdi jańa formattaǵy top dep aıtýǵa bolady. Elimizde ár túrli orkestrler bar, biraq olar mýzykany óz baǵyttary ǵana boıynsha oınaıdy. Biz ázildi aralastyra otyryp, ár mýzyka janrynyń qosyndysynan jańa dúnıeler oılap taptyq, oǵan qosa bı de bar, búgin bizdiń ónerimizdi tamashalaýǵa kelgen kórermen qaýymnyń tik turyp qatty qoshemet kórsetýine qaraǵanda jańa formatta úndesin tapqan mýzykalar unady dep oılaımyn», - dedi atalmysh sharanyń uıymdastyrýshysy, toptyń jetekshisi Gaýhar Tasbergenova.
Onyń aıtýynsha, top ótken jyly kúz aıynda qurylǵan. «Daıyndyq jumystaryna 2-3 aı ketti. Mundaǵy ónerpazdar ár túrli orkestrlerde óner kórsetip júrgen, búginde elimizde ǵana emes, shetelde tanymal bolyp úlgergen oryndaýshylar, respýblıkalyq jáne halyqaralyq baıqaýlardyń laýreattary», -dedi G. Tasbergenova.
