Almatyda Kúlásh Baıseıitovanyń eskertkishi ashyldy
MATY. 15 qyrkúıek. QazAqparat /Názıra Eleýhan/ - Búgin Almatyda Kúlásh Baıseıitova atyndaǵy daryndy balalarǵa arnalǵan mektep- ınternatynda QSRO-nyń halyq ártisi, Memlekettik syılyqtardyń laýreaty,
áıgili ánshi - "Qazaqtyń bulbuly" Kúlásh Baıseıitovanyń 100 jyldyǵyna oraı, ánshige arnalǵan eskertkishtiń ashylý saltanaty bolyp ótti.
Eskertkish daryndy talant ıesi atyndaǵy mektep- ınternatynyń bastamasymen jáne "Qubyla", "№1" qurylys kompanııasynyń, sonymen qatar qala ákimdigi men Bostandyq aýdany ákimdiginiń qoldaý-demeýshiligimen turǵyzyldy.
Eskertkishtiń bıiktigi 3 metr. Músin synama qoladan quıylǵan. "Eskertkishti turǵyzýda áıgili ánshiniń qysqa ómirin, qarapaıymdylyǵy men sulýlyǵyn kórsetýge tyrystym. Onyń beınesin murajaıynda turǵan tarıhı sýretine qarap jasadym. Músindi jasaýǵa bir aı ýaqyt ketti", -dedi eskertkishtiń avtory, músinshi Tileýberdi Bınashev.
Ashylý saltanatyna qala ákimi Ahmetjan Esimov, QR Mádenıet vıtse-mınıstri Asqar Bóribaev, mektep ujymy, óner qaıratkerleri men zııaly qaýym, ánshi, mýzykanttar, Kúlásh Baıseıitovanyń týǵan-týystary men balalary qatysty.
"Bizdiń qalamyz qazaq óneri men mádenıetiniń baıyrǵy ordasy. Qazaq operalary osynda dúnıege kelip, sahnaǵa shyqty. Sonyń alǵashqy ánshisi jáne ony bıik dárejege kótergen talantty tulǵanyń biri - Kúlásh Baıseıitova bolatyn. Týma talant álemdik klassıkalyq ónerdi jedel ıgerip, ulttyq ortada sheberlikpen damyta bildi. Óziniń qaıtalanbas darynymen qazaq operasyn az ýaqyt ishinde álemdik deńgeıge kóterdi. Ásem daýsymen eldiń dańqyn, halqynyń mereıin arttyrdy. Ozyq mádenıetimizdi halyqaralyq óner týyndylarymen baıytty. Qazaq qyzdarynyń ishinen shyqqan tuńǵysh opera ánshisi Máskeý sahnalarynda án salyp, Keńes Odaǵynda talǵampaz kórermen qoshemetine bólendi. Ol somdaǵan qazaq arýlarynyń qaıtalbas beıneleri halyqtyń máńgilik esinde qalady. Óziniń bar ǵumyryn qazaq ónerin damytýǵa arnaǵan onyń ónerge adaldyǵy, adamgershiligi men kásibı sheberligi qazaq óneriniń qaıratkerlerine, barsha jas qaýymǵa úlgi ónege. Búginde osyndaı asyl qyzdarymyzdy ulyqtaý el táýelsizdiginiń arqasynda, memleket basshysynyń qoldaýymen múmkin bolyp otyr. Áıgili ánshiniń búkil shyǵarmashylyq ýaqyty ótken Almaty qalasy Kúlásh atyn árqashan ardaq tutyp, esimin jas urpaqqa ónege etip keledi. Búgingi eskertkish sol qurmettiń bir kórinisi. Bul jalpy táýelsiz elimizdiń ulttyq ónerge, óner tulǵalaryna degen qurmettiń bir belgisi",-dedi qala ákimi Ahmetjan Esimov eskertkishtiń ashylý saltanatynda.
Kúlásh Baıseıitova qysqa da bolsa jarqyn ómirimen, kúmis kómeı, jez tańdaı ánshiligimen qazaqty tanytqan. Ol ónerli ordada týyp ósip, halyq ánderinen nár alǵan. Onyń óner joly ataqty ártis Serke Qojamqulovtyń drama úıirmesinen bastalǵan. Jas ánshiniń óner joly keıinnen Italııada shyńdalyp, onyń operalyq ánshilik múmkindigi jarqyraı ashylady. Qaıtalanbas, tańǵajaıyp, ásem daýsymen, ártistik darynymen erekshelengen Kúlásh Baıseıitova jastaıynan-aq Halyq ártisi atanyp, Memlekettik syılyqtardy ıelenedi. Aqqý ǵumyr, jeztańdaı ánshi ómirden ozsa da, ol somdaǵan jarqyn beıneler syńǵyr únimen súıgen halqynyń júreginde saqtalyp keledi.
