Almatyda Kúlásh Baıseıitovanyń 100 jyldyǵyna arnalǵan kesh ótedi
ALMATY. 4 naýryz. QazAqparat -Almatyda 14 naýryz kúni Abaı atyndaǵy Qazaq memlekettik akademııalyq opera jáne balet teatrynda KSRO-nyń halyq ártisi, qazaqtyń opera óneriniń negizin qalaýshylardyń biri, memlekettik syılyqtardyń laýreaty, áıgili ánshi Kúlásh Baıseıitovanyń týǵanyna 100 tolýyna arnalǵan kesh ótedi.
Bul týraly atalmysh teatrdyń baspasóz qyzmetinen habarlady.
Kontsertke Qurmanǵazy atyndaǵy Qazaqtyń memlekettik akademııalyq halyq aspaptar orkestri, sımfonııalyq orkestr, Abaı atyndaǵy Qazaq memlekettik akademııalyq opera jáne balet teatrynyń ánshileri men balet bıshileri qatysady.
«Qazaqtyń bulbuly" atanǵan Kúlásh Baıseıitova (1912-1957 jj.) Almatyda dúnıege kelgen. 1925-1928 jyldary Almaty pedagogıkalyq tehnıkýmynda jáne Qazaq drama teatry janyndaǵy mýzykalyq-dramalyq stýdııada oqyǵan. K.Baıseıitova - qazaq operalyq ónerin qalaýshylardyń biri. Birinshi ret qazaq sahnasynda ol klassıkalyq operalardaǵy - Batterflıaı (Dj Pýchchınıdiń "Chıo-Chıo- San"), Tatıana (P. I.Chaıkovskııdiń "Evgenıı Onegıni") taǵy basqa partııalardy oryndady. Kúlásh Baıseıitova - áıgili ánshi ǵana emes, sırek sahnalyq talant ıesi, ol jasaǵan beıneler ártúrli minezdemelerdiń birtutas galereıasyn qurady. Daryn ıesi M. Áýezovtyń mýzykalyq komedııasyndaǵy Aımandy, «Eńlik - Kebek» qoıylymyndaǵy Eńlikti, I. V. Kotsyktyń "Aıman-Sholpanyndaǵy" Aımandy, «Úılený» qoıylymyndaǵy Agafıa Tıhonovany, sonymen qatar, E. G. Brýsılovskııdiń "Qyz Jibek" qoıylymynda Jibekti jáne taǵy basqa kóptegen beınelerdi somdady.
Almatyda týma talant ıesi atynda kóshe men mýzykalyq mektep bar.
