Almatyda qulaǵynda múkisi bar balalarǵa kohlearly ımplant ornatylyp jatyr
ALMATY. QazAqparat – Joǵary tehnologııalardyń kómegimen jasalatyn operatsııalar ishten qulaǵy múkis bolyp týǵan búldirshinderge estý qabiletin qaıtarýǵa múmkindik beredi. Búginde Almatylyq balalar mindetti áleýmettik medıtsınalyq saqtandyrý paketine kiretin kohlearly ımplantatsııa qyzmetin kedergisiz paıdalanyp júr, dep habarlaıdy QazAqparat tilshisi.
Qulaqtyń syrtyna arnaıy elektrodtardy ornatý arqyly jasalatyn otanyń quny orta eseppen 4,5-5 mln teńge. Mamandardyń aıtýynsha, elektrondy ımplant ornatylǵannan keıin qulaǵy múldem estimeıtin balalardyń da estý qabiletin qaıtarýǵa bolady.
Atalǵan qyzmet túrin medıtsınalyq saqtandyrý paketi esebinen tegin paıdalanyp kele jatqandar arasynda №5 Qalalyq klınıkalyq aýrýhananyń kishkentaı patsıentteri de bar. Saqtandyrý júıesi engizilgen 2020 jyldyń ózinde atalǵan aýrýhanada 84 balaǵa kohlearly ımplant ornatylydy.
«Jalpy, estý qabiletiniń oralý merzimi kereńdik deńgeıine baılanysty. Bizdiń patsıentterimiz ota jasalǵan soń bir aıdan keıin-aq estı bastaıdy. Aldymen til protsessoryn iske qosamyz, olardy sóıleýge, estýge jáne uǵýǵa úıretemiz. Estý qabiletinen erte aıyrylǵan balalar reabılıtatsııa barysynda jańa dybystardy tyńdaýǵa mashyqtanady, tilin damytady. Al, sóılep júrip estý qabiletinen aıyrylǵan patsıentterdi ońaltý budan kúrdelirek. Mundaı jaǵdaıda reabılıtatsııa alty aıdan bir jylǵa deıin sozylýy múmkin. Sebebi biz qulaqpen emes, mımen estımiz. Patsıentter aldymen, osyny uǵynýy tıis», - deıdi №5 qalalyq klınıkalyq aýrýhananyń sýrdologııa bólimi meńgerýshisi Naılıa Tólepbergenova.
Dárigerdiń aıtýynsha, buryn osynda ota jasatqan balalar arasynda mýzyka salasyndaǵy syılyqtardyń laýreattary da bar.
«Kohlearly ımplant qoıdyrǵan balalar nashar estıdi deýge bolmaıdy. Mundaı balalardyń ózderimen qatar búldirshinderden esh aıyrmashylyǵy joq. Operatsııa olardyń estý qabiletin tolyǵymen qaıtarýǵa múmkindik beredi. Kómek keshiktirilmeı, erterek kórsetilgen jaǵdaıda bala kádimgi balabaqshaǵa barady, keıin jalpy bilim beretin mektepte bilim alady. Bizdiń basty maqsatymyz da osy», - deıdi dáriger.
Medıtsınalyq saqtandyrý qory Almaty fılıalynyń dırektory Tileýhan Ábildaevtyń aıtýynsha, 18 jasqa deıingi balalar memleket tarapynan saqtandyrylatyn jeńildigi bar sanatqa jatady. Olarǵa barlyq qyzmetti, sonyń ishinde joǵary tehnologııaly kómek pen josparly stomatologııalyq kómekti de medıtsınalyq saqtandyrý paketi esebinen kórsetiledi.
