Almatyda qulaǵan ushaqta bolǵan nárestelerdiń jaǵdaıy qalaı
ALMATY. QazAqparat – Almatyda dárigerler qulaǵan ushaqta zardap shekken balalardyń jaǵdaıy týraly aıtyp berdi, dep habarlaıdy QazAqparat tilshisi.
Qaıǵyly oqıǵadan soń balalarǵa shuǵyl medıtsınalyq kómek kórsetý ortalyǵyna 9 bala jetkizilgen.
«Bizge 9 bala jetkizildi. Onyń úsheýi - bir jasqa deıingi balalar. 3 bala bólimshede jatyr. Qalǵan 6 bala jansaqtaý bóliminde. San súıegi synǵan eki balaǵa ota jasaldy. Jaǵdaılary birqalypty. Ómirine esh qaýip tónip turǵan joq. Barlyq medıtsınalyq preparattar jetkilikti. Balalardyń ata-analary aman dep estidik. Týystary kelip balalardy kórip ketti», - dedi ortalyqtyń bas dárigeri Abaı Qusaıynov.
Aıta keteıik, búgin tańerteń Almatydan Nur-Sultan qalasyna ushyp shyqqan ushaq radardan joǵalyp ketti. Keıin 93 jolaýshy men 5 ekıpaj múshesi bar ushaqtyń apatqa ushyraǵany málim boldy. Oqıǵanyń mán-jaıyn anyqtaý úshin ushaq qulaǵan aýmaqqa arnaıy komıssııa ushyp shyqty.
