Almatyda quqyq qorǵaý júıesiniń ózekti máseleleri talqylandy
ALMATY. Qazannyń 27-si. QazAqparat /Erbol Turymbetov/ - Búgin Almatydaǵy «Tıan-Shan» qonaqúıinde «Qazaqstannyń quqyq qorǵaý júıesin reformalaýdyń negizgi kontýrlary» taqyrybynda dóńgelek ústel bolyp ótti.
Ony QR Mádenıet mınıstrliginiń tapsyrysymen «Alternatıva» ózekti zertteýler ortalyǵy uıymdastyryp otyr. Otyrysqa JOO-lardyń zań ǵylymdary jónindegi professorlary men birqatar ÚEU jáne ІІM akademııasynyń ókilderi qatysty.
Jıyn barysynda Qazaqstannyń quqyq qorǵaý júıesiniń ózekti máselelerine, olardy sheshý joldary men reformalaýǵa qatysty birneshe baıandamalar oqylyp, talqylaýlar boldy. «Strategııa» áleýmettik jáne saıası zertteýler ortalyǵynyń prezıdenti Gúlmıra Eleýova óziniń «Qazaqstandyqtardyń quqyq qorǵaý organdaryna kózqarasy» atty baıandamasynda halyqtyń jaqsy pikirde ekendigin jetkizdi. «Sońǵy, osy jyldyń naýryz aıynda júrgizilgen statıstıkalyq zertteýler boıynsha, turǵyndardyń 63 paıyzy ózderin qaýipsiz sezinetindikterin kórsetti. Al quqyq qorǵaýshylardyń qyzmetin baǵalaýda UQK joǵary kórsetkishke ıe bolsa, eń tómengi orynda jol polıtsııasy qyzmeti», dedi G. Eleýova. Ol sonymen birge azamattardyń kóbinese osy jol polıtseılerimen túsinispeýshilikteri oryn alatyndyǵyn málim etti.
