Almatyda quqyq qorǵaý organdary júıesin reformalaýdyń ózekti máseleleri talqylanýda
ALMATY. Aqpannyń 5-i. QazAqparat /Názıra Eleýhan/ - Uıymdasqan qylmys pen sybaılas jemqorlyqqa qarsy kúres júrgizetin Prezıdentke tikeleı baǵynatyn Agenttiktiń bazasynda tergeýshilerdi bir jerge shoǵyrlandyratyn jańa organ qurý qajettigi týdy.
Tergeýshilerdiń bárin bir jerge shoǵyrlandyryp, vedomstvolyq baǵynyshtylyqtan shyǵaryp, táýelsiz bir organ qursaq, qylmyspen kúres júrgizý saıasatyndaǵy isimiz alǵa basar edi. Bul týraly búgin Almatyda "Jańa onjyldyq-jańa ekonomıkalyq órleý-Qazaqstannyń jańa múmkinshilikteri" atty el Prezıdentiniń Qazaqstan halqyna Joldaýy aıasynda "Qazaqstan Respýblıkasy quqyq qorǵaý júıesin jetildirý máseleleri" taqyrybynda ótken dóńgelek ústel barysynda ál-Farabı atyndaǵy QazUÝ zań fakýltetiniń dotsenti, zań ǵylymdarynyń kandıdaty Shaımardan Sháripov málim etti, dep habarlaıdy QazAqparat.
Onyń aıtýynsha, quqyq qorǵaý júıesin reformalaý búgingi kúni ábden pisken másele. «Bul tustaǵy máseleler qordalanyp qaldy. Sonyń ishinde, bizdi quqyq qorǵaý oryndarynyń quramdas bóligi - tergeý oryndarynyń máselesi, búgingi jaǵdaıy, keleshegi qandaı bolmaq degen problemalar oılandyrady. Bul birinshiden, ekinshiden 2007 jylǵy ózgeristerge laıyq, tergeýge baılanysty 84-shi baby alynyp, tergeýdi sot ta, prokýror da júrgize alady degen áńgimeler júrip jatyr. Osy tusta prokýratýra organdaryndaǵy is-qımylda tergeý fýnktsııalaryn ózine qaıyrý máselesi qoıylyp otyr. Bizdiń pikirimizshe, bul asyǵystyq. Prokýrordyń qadaǵalaý fýnktsııasymen qalǵany jón dep sanaımyz», dedi Shaımardan Sháripov.
Dóńgelek ústeldiń jumysyna Almaty qalasy quqyq qorǵaý organdarynyń jáne "NurOtan" HDP jetekshileri men ókilderi, Qazaqstannyń jetekshi quqyqtaný mamandary, ál-Farabı atyndaǵy QazUÝ, Almaty qalasyndaǵy Іshki ister mınıstrligi Akademııasy, QR Qarjy polıtsııasy Akademııasy, sonymen qatar, Abaı atyndaǵy QazUPÝ-niń ǵalym zańgerleri qatysty.
Jıyn barysynda Elbasynyń halyqqa Joldaýy turǵysynan quqyq qorǵaý júıesin reformalaýdyń konstıtýtsııalyq-quqyqtyq negizderi, sot organdary qyzmetiniń basymdy baǵyty, Elbasy Joldaýynyń erejelerin júzege asyrý barysynda quqyq qorǵaý organdarynyń ózara áreket etý máseleleri qarastyrylyp, talqylandy.
