Almatyda qudyqqa túsip, ýlanyp qalǵan «Almaty sý» qyzmetkerleriniń jaǵdaıy aýyr
ALMATY.QazAqparat - Almatyda káriz qudyǵyna túsip ýlanǵan «Almaty Sý» qyzmetkerleri óte aýyr halde jatyr, dep habarlaıdy QazAqparat tilshisi.
Qalalyq Qoǵamdyq densaýlyq saqtaý basqarmasynyń habarlaýynsha, 25 jáne 42 jastaǵy eki adam №7 qalalyq aýrýhanaǵa shuǵyl jetkizilgen.
«Jansaqtaý bóliminde reanımatolog, travmatolog, neırohırýrg mamandar naýqastardy qarap shyqty. Barlyq klınıkalyq dıagnostıkalyq sharalar jasaldy. Olar kúkirt sýtekti gazymen ýlanǵan. Ortalyq júıke júıesi zaqymdalǵan. Ýytty entsefalopatııa dıagnozy qoıyldy. Ekeýi de komada jatyr. Jasandy tynys alý apparatyna qosylǵan. Tańǵa jaqyn da jaǵdaılary ózgermedi»- dedi basqarmadan.
Aıta keteıik, osyǵan deıin Almatyda HQO qyzmetikeriniń káriz qudyǵyna túsip, ýlanyp qalǵan eki azamatty qutqarǵanyn jazǵan bolatynbyz.
Kásiporyn bul oqıǵaǵa baılanysty túsinik berdi.
«1 maýsymda «Almaty sý» kásipornynyń qyzmetkerleri kommertsııalyq uıymdardyń sý esepteý quralyn teksermek bolǵan. Qyzmetkerler qatelesip sýdyń emes, káriz júıesiniń qaqpaǵyn ashyp qaraǵan. Sonyń kesirinen gaz býymen ýlanǵan. Qazir kásiporynda qyzmettik tekserý júrip jatyr. Negizinde «Almaty sý» qyzmetkerleri esepteý quraldarynyń kórsetkishin tirkeýmen ǵana aınalysýy tıis. Qudyqtarǵa túsý múlde olardyń mindetine kirmeıdi», - dedi «Almaty sý» MKK.
