Almatyda qudyq sýyn iship kelgen aýdandarǵa qubyr jelileri tartyldy
ALMATY. QazAqparat - Almatydaǵy Naýryzbaı aýdanynyń 30 myńnan astam turǵyny taza aýyz sýmen qamtyldy, dep habarlaıdy QazAqparat tilshisi qalalyq ákimdikke silteme jasaı otyryp.
Naýryzbaı aýdanynda jańa ınjenerlik jelilerdiń iske qosylýy arqasynda «Alty alash», «Qalqaman-2» eldi mekenderiniń jeke sektoryndaǵy 5 myń úıge jáne «Qalqaman-3» yqsham aýdanyndaǵy 30 myńǵa jýyq turǵynǵa jańa jeli arqyly taza aýyz sý jetkizildi.
«Ár úıge taza sýyq sý jańa qubyrlar arqyly berildi. Ortalyqtandyrylǵan sý jelisine qosylǵysy kelgen turǵyndar «Almaty sý» MKK-men tıisti kelisimshart jasaýy qajet», - dedi Almaty qalasynyń Energetıka jáne kommýnaldyq sharýashylyq basqarmasynan.
Buǵan deıin atalǵan eldi mekenderdiń turǵyndary tehnıkalyq talaptar saqtalmaǵan jeke sý skvajınalaryn jáne qoldan jasalǵan sý jelilerin paıdalanyp kelgen edi. Jaz aıynda sýdyń qýaty báseńdeıtin.
«Keleńsiz jaıttardyń aldyn alý jáne sýyq sýmen turǵyndardy turaqty qamtamasyz etý úshin jańa jelilerde nasosty stantsııalardyń qýaty arttyryldy. 4 myńǵa jýyq turǵyn ortalyqtanǵan sý jelisine qosylý úshin qujattar tapsyrdy. Bir aı ishinde barlyq tutynýshylardyń qujattary toltyrylady jáne olar jańa jelige qosylady», - delingen vedomstvo habarlamasynda.
Ortalyq sý jelisine qosý jumystary «Qalqaman-3» yqsham aýdanynan bastaldy. Qazirgi kezde munda 560 jeke úı taza aýyz sýdy paıdalanyp otyr.
Almaty qalasynyń Energetıka jáne kommýnaldyq sharýashylyq basqarmasynyń málimetine súıensek, 209 shaqyrymdyq jańa sý jelisi memleket esebinen júrgizilgen.
