Almatyda qudyq ishinde ýlanyp, esinen tanyp qalǵan eki adamdy qutqarǵan azamat marapattaldy
ALMATY. QazAqparat - «Azamattarǵa arnalǵan úkimet» memlekettik korporatsııasy Naýryzbaı aýdanynyń HQO mamany Erjan Ábdirazaqovty Basqarma tóraıymynyń alǵys hatymen marapattady. HQO qyzmetkeri qudyqqa qulap, ýlanyp qalǵan eki jigitti qutqarǵan bolatyn, dep habarlaıdy QazAqparat tilshisi.
Sondaı-aq Erjanǵa memlekettik korporatsııanyń kásipodaq qyzmetiniń damýyna qosqan úlesi úshin «Eńbek dańqy» medali tabystaldy.
Basqarma tóraıymy men kásipodaq uıymy atynan berilgen eki marapatty «Azamattarǵa arnalǵan úkimet» memlekettik korporatsııasynyń Almaty qalasyndaǵy fılıalynyń dırektory Danııar Qyryqbaev tabys etti.
Óz atynan fılıal basshysy Erjan Ábdirazaqovqa estelik syılyq – qol saǵatty syıǵa tartty.
Esterińizge salsaq, 1 maýsymda Almaty qalasynyń Naýryzbaı aýdandyq HQO qyzmetkeri Erjan Ábdirazaqov óz ómirin qaterge tigip, eki adamdy ajaldan qutqaryp qaldy. Káriz qudyqtarynyń birinde jóndeý jumystaryn júrgizgen «Almaty Sý» kompanııasynyń qyzmetkerleri jumys kezinde gaz tútinimen ýlanyp, esinen tana qulaǵan. Erjan Ábdirazaqov olardy qutqarý úshin qudyqqa alǵashqylardyń biri bolyp tústi.
Eki adamnyń janyna arasha bolǵan Erjan olardyń hal-jaǵdaıyn bilip qana qoımaı, ýlanǵandardyń biri Nurjan Qalbaıdy aýrýhanadan shyǵaryp alǵan. Zardap shekken ekinshi azamat Asqar Qaınazarov aýrýhanadan shilde aıynyń basynda shyǵaryldy.
«Tómenge túsý kerek pe, joq pa degen oıyma da kelmedi, olardy ólimnen aman alyp qalý kerek. Sol sátte ózimdi emes, solardy qutqarý ǵana oıymda boldy. Eki azamattyń da aýrýhanadan shyqqanyna jáne din amandyǵyna qýanyshtymyn. Bul – men úshin eń qymbat syı», – deıdi Erjan.
Aıta ketý kerek, Erjannyń erligin estigen QR Tsıfrlyq damý, ınnovatsııalar jáne aeroǵarysh ónerkásibi mınıstri Asqar Jumaǵalıev oǵan qońyraý shalyp, batyldyǵy úshin jeke alǵysyn bildirdi.
«Erjan Ábdirazaqov memlekettik korporatsııada 2007 jyldan beri jumys isteıdi. Osy ýaqyt aralyǵynda ol óz isiniń bilgir mamany ekenin birneshe ret dáleldedi. Bizdiń ujymda osyndaı adal jáne jaýapty qyzmetkerdiń jumys isteıtinin biz maqtan tutamyz», – dedi «Azamattarǵa arnalǵan úkimet» Almaty qalalyq fılıalynyń dırektory Danııar Qyryqbaev.
