Almatyda kúdikke ilingen qos kólikten birneshe sýyq qarý tárkilendi
ALMATY. QazAqparat – Almatynyń Alataý aýdany aýmaǵynda kúdikti kóringen eki Toyota avtokóliginiń júrgizýshileri polıtsııa nazaryna ilikti, dep habarlaıdy QazAqparat tilshisi.
«Tártip saqshylaryn kóre sala júrgizýshi men onyń jolaýshylary jan-jaqqa qasha jónelgen. Alaıda, olar qolǵa tústi. Olardyń kólikterin tekserý barysynda Saıga jáne TOZ qarýlary, pyshaq, travmatıkalyq tapansha, oq anyqtaldy jáne tárkilendi. Ustalǵan azamattar Almaty qalasynyń jáne Almaty oblysynyń turǵyndary ekendigi belgili boldy. Eń jasy 19 da bolsa, úlkeni 37 jasta. Qolǵa túsken 8 kúdiktiniń úsheýi buryn sotty bolǵan», - dedi Alataý aýdandyq polıtsııa basqarmasynyń bastyǵy Talǵat Berkinbaev.
Polıtsııa ókiliniń aıtýynsha, atalǵan derek sotqa deıingi tergeýdiń biryńǵaı tizilimine QR QK-niń 287-baby boıynsha tirkeldi. Saraptamalyq zertteýdiń qorytyndysyn eskere otyryp, qylmystyq is boıynsha qaýly shyǵaryldy.
«QR QPK-niń 201-babyna sáıkes ózge aqparattar tergeý múddesine oraı jarııalaýǵa jatpaıdy. QR Konstıtýtsııasy 77-babynyń 3-tarmaǵy 1-tarmaqshasyna jáne QR QPK-niń 19-baby 1-bóligine sáıkes, zańdy kúshine engen sot úkimimen belgilengenge deıin árbir adam qylmystyq quqyq buzýshylyq jasaýda kinásiz dep tanylady», - dep atap ótti ol.
