Almatyda qubyrlardyń astynda qalǵan qyz eki aıdan keıin ǵana aıaǵynan tura alady
ALMATY. QazAqparat - Almatyda júk kóliginen qulaǵan aýyr qubyrlar basyp qalǵan boıjetkenge ota jasaldy, endi ol ambýlatorııalyq em qabyldaýǵa ázirlenip jatyr, dep habarlady Almaty qalasyndaǵy 4-shi klınıkalyq emhana dárigeriniń oryndasary Qanat Tezekbaev.
«7 shilde kúni bizdiń aýrýhanaǵa túsken emdelýshi Beloýsovanyń jaǵdaıy turaqtanǵannan keıin, 17 shilde kúni oǵan eki ota jasaldy. Ota onyń jambas súıegine jasaldy. Qazirgi ýaqytta emdelýshiniń jaǵdaıy qanaǵattarlyq, jaralary jazylyp keledi. Ony kelesi aptanyń basynda ambýlatorııalyq emdeýge shyǵarý josparlanyp otyr. Jalpy, jambas súıeginiń synyǵy 2,5-5 aıda bitedi. Sondyqtan, ol áli de dárigerlerdiń baqylaýynda bolady. Shamamen, 2 aıdan keıin aıaǵynan tik tura alady. Ol múgedek bolmaıdy, óz aıaǵymen júretin bolady», dedi 4-shi qalalyq aýrýhana bas dárigeriniń orynbasary Qanat Tezekbaev.
Eske sala keteıik , Almatyda jylý jelisiniń qubyrlaryn tasymaldap bara jatqan KamAZ júk kóligi jol apatyna ushyraǵan bolatyn. Júrgizýshi burylysqa kelgende rýlden aıyrylyp qalyp, qubyrlar aýdarylǵan tirkemeden syrǵyp túsken. Sol kezde dıametri shamamen 60 sm bolatyn temir qubyrlar dóńgelep baryp, joldan ótip bara jatqan qyzdy jaraqattaǵan bolatyn.
