Almatyda qubylmaly aýa-raıy aptanyń sońyna sheıin saqtalady
ALMATY. QazAqparat- Almatyda keshe keshke qaraı bir mezette nóser jaýyn jaýyp, qatty jel turdy. Qalanyń keıbir aýmaqtarynda tipti burshaq jaýdy. Búgin sınoptıkter osyǵan baılanysty túsinikteme berdi. «Qazgıdromet» RMK Almaty fılıalynyń meteoboljamdar bóliminiń ınjener-sınoptıgi Gúltańsyq Medeýovanyń aıtýynsha, mundaı qubylystar Almatyda negizinen jaz mezgilinde tústen keıin bolyp turady.
Qazirgi ýaqytta Almaty oblysy aýmaǵynan Iran aýmaǵynan shyqqan tsıklon ótip jatyr. Bul tsıklon tolqyn ispettes júrýde.
«Jyly baǵyt ótkende aýa-raıy ashylyp, kún ysıdy. Al sýyq baǵyt ótkende aýa bulttanyp, jel turyp, nóser jaýyndar jaýady. Keshe 13 mm kóleminde jańbyr jaýdy. Onyń aldynda qatty jel turyp, naızaǵaı oınady. Qalanyń keıbir aýmaqtarynda burshaq jaýdy. Bul da nóserli jaýyndarǵa tán qubylys», - dedi sınoptık.
Sonymen qatar, G. Medeýova Almaty oblysynda sekýndyna - 34 metr, Esik qalasynda - 30 m, Almaty irgesindegi Kamenskoe taqtasy aýmaǵynda - 30 m jyldamdyqpen jel turǵandyǵyn aıtty. Al Almatyda bolǵan jeldiń jyldamdyǵy sekýndyna 8 metrdi quraǵan. Ol bul qubylysty tústen keıin aýanyń qatty ysyp, joǵary qaraı týrbýlentti túrde kóterilgendigimen baılanystyrady.
«Jylynǵan aýa muzdaı aýamen túıisip, ózara aralasady. Sodan túıdek-túıdek shoǵyr bulttar qalyptasady. Al bul, qatty jeldiń turýyna ákep soǵady. Ol uzaqqa sozylatyn daýyl emes, azdaǵan ýaqyt qana bolatyn qatty jel. Sondaı-aq, qalanyń bir jerinde aýa-raıy ashyq bolsa, ekinshi jerinde bultty bolady. Mine, osylaısha, aýa massasynyń túıisýi saldarynan osyndaı qubylystar oryn alady», - dedi G. Medeýova.
Onyń aıtýynsha, Almatyda aýa-raıynyń turaqsyzdyǵy, ıaǵnı qubylmalylyǵy 23 shildege deıin jalǵasady. Bul kúnderi Almaty qalasy men oblysynda jańbyr jaýyp, jel turady. Burshaq jaýýy da yqtımal.
