Almatyda «Qýat» korporatsııasy salǵan turǵyn úı paıdalanýǵa berildi
ALMATY. Qazannyń 4-i. QazAqparat /Názıra Eleýhan/- Búgin Almatyda «Qýat» korporatsııasy» AQ-nyń qurylysy uzaqqa sozylǵan nysandarynyń biri - «Úshtóbe» turǵyn úı kesheni paıdalanýǵa berilip, 92 úleskerge kópten kútken páter kiltteri tabys etildi.
Úleskerler Almaty qalasy ákimshiligi, "Samuryq-Qazyna" UÁQ, Kazkommertsbank jáne Global Building Contract áriptestigi nátıjesinde ózderine tıesili páterlerine ıe boldy. Qurylysty aıaqtaýǵa qajetti 1,255 mıllıon teńge kólemindegi qarjyny Kazkommertsbank "Stresti aktıvter qory" AQ-y 20 mıllıard teńge esebinen bólgen. Bul keshen - «Qýat» korporatsııasynyń, "Samuryq-Qazyna" qory men Astana jáne Almaty ákimshilikteri arasynda 2009 jyly mamyr aıynda qabyldanǵan Memorandýmǵa sáıkes salynyp bitýi tıis aıaqtalmaǵan jeti turǵyn úı keshenderiniń biri.
«Úshtóbe» turǵyn úı kesheni 16 qabatty eki ǵımarattan, oǵan qosa kommertsııalyq jáne saýda alańdarynan, 79 avtokólikke eseptelgen avtoparkıngten turady. Keshenniń jalpy aýdany - 22 606 sharshy metr.
Úleskerlerge páter kiltterin tabys etken Almaty qalasy ákiminiń orynbasary Vıktor Doljenkov: "Jyl sońyna deıin 4 625 úlesker óz páterlerin alady. Jalpy alǵanda bizde 5 500 úlesker qaldy. Onyń 3 300-i kelesi jylǵa qalady. Degenmen, biz 2011 jylǵa qalatyn úleskerlerge osy «Úshtóbe» turǵyn úı kesheninen páterler berýdi uıǵaryp otyrmyz", dedi.
Ashylý saltanatynda sóz sóılegen «Global Building Contract» JShS jobalaý kompanııasynyń dırektory Bolat Saýranbaev : «Jospar boıynsha, nysandar óz merziminde tapsyryldy, sol arqyly biz memleket, úleskerler jáne Kazkommertsbank aldyndaǵy mindetterimizdi oryndadyq. Aıta keterlik jaıt, ákimshiliktiń der kezinde qabyldaǵan sheshimi bizge jumysty merziminde bitirý men qurylys sapasyna nazar aýdarýǵa jol ashty», dep atap ótti.
Kazkommertsbanktiń atqarýshy dırektory Maǵjan Áýezov: «Biz áýel bastan qaladaǵy turǵyn úı qurylystaryn aıaqtaýdyń mańyzdylyǵyn túsindik. Jumys barysynda memleket qarjysyn óz maqsatynda jumsaýǵa, nysandy merziminde ótkizýge jáne óz qunyn asyrmaýǵa basa kóńil bóldik. Basqa da nysandar belgilengen merzimde aıaqtalady dep senemin», dedi.
