Almatyda kýáligi joq júrgizýshi qoǵamdyq kólik aıdaǵan
ALMATY. QazAqparat – Almatyda jalǵan qujatpen qoǵamdyq kólikti basqarǵan júrgizýshi anyqtaldy, dep habarlaıdy QazAqparat tilshisi.
Almaty qalalyq Polıtsııa departamentiniń málimetinshe, qoǵamdyq kóliktiń júrgizýshisi jalǵan júrgizýshi kýáligimen ustaldy. Belgili bolǵanydaı er adam 2021 jyly kólik quralyn basqarý quqyǵynan aıyrylǵan.
«Alaıda S. esimdi azamat jalǵan júrgizýshi kýáligin jasap, zańdy aınalyp ótpekshi boldy. Quqyq buzýshy № 85-baǵyttaǵy qoǵamdyq kólikti basqaryp kele jatyp, avtovokzal mańyndaǵy aıaldamada ustaldy. Onyń jeke basyn tekserý kezinde jalǵan qujattyń paıdalanǵany anyqtaldy, sonymen qatar oǵan jolaýshylardy tasymaldaýǵa múmkindik beretin sanattar sheberlikpen qosylǵan. Kólikti toqtatqan sátte ishinde 40-tan astam jolaýshy boldy. Aýdandyq Polıtsııa basqarmasynda jalǵan qujat jasaý deregi boıynsha sotqa deıingi tergeý bastaldy»,- Almaty qalalyq PD Ákimshilik polıtsııa basqarmasy bastyǵynyń orynbasary Dáýlet Seıitqulov.
Polıtsııa ókiliniń aıtýynsha, júrgizýshige jáne onyń qujattaryn durys qadaǵalamaǵan avtopark basshylyǵyna qatysty ákimshilik shara qoldanyldy. Qoǵamdyq kólik mamandandyrylǵan aıyppul turaǵyna qoıyldy.
Aıta keteıik, Almatyda 2022 jyldyń 19 shildesi men 18 tamyzy aralyǵynda jol-kólik oqıǵalarynyń jáne onyń zardaptarynyń aýyrlyǵyn aldyn alýǵa jáne azaıtýǵa baǵyttalǵan «Qaýipsiz jol» respýblıkalyq aılyǵy ótip jatyr.
