Almatyda KSRO jáne QazKSR halyq ártisi Sábıra Maıqanovaǵa arnalǵan "Teatr kóktemi-2010" festıvali máresine jetti

dep habarlaıdy QazAqparat.

Festıvalde Sábıra Maıqanova atyndaǵy «Eń úzdik áıel» beınesi júldesin keshe ǵana premerasy bolyp ótken «Muragerler» qoıylymynda Salıha rólin jaqsy somdaǵany úshin Ǵazıza Ábdinábıeva aldy. «Birinshiden, teatrǵa, sodan keıin áriptesterime Sábıra apamyzdyń rólin ashýǵa kómekteskenine alǵysymdy bildirgim keledi. Róldi somdaýǵa bir aı daıyndaldym, alǵash teatrǵa kelgende Sábıra apanyń repetıtsııada kıgen kıimderin maǵan bergen bolatyn. Sodan bastap, ishteı tileý tilep, baıaǵydan daıyndalyp júrdim. Árıne, bul róldi bergende qatty qobaljydym. Keıipker rólin oıdaǵydaı alyp shyqqanyma qýanyshtymyn. Sábıra apamyz asqaq Alataý ǵoı, biz onyń etegindegi tóbe bolsaqta soǵan rızamyz», dedi Ǵazıza Ábdinábıeva.

Sonymen qatar, osymen 15-shi ret ótip otyrǵan dástúrli festıvaldiń «Úmit» júldesin «Kóshkin» qoıylymynyń rejısseri Alma Kákisheva ıelendi. Al, óz keıipkerlerin oıdaǵydaı somdaǵany úshin «Tusaý keser» júldesin Lázzat Qaldybekova, «Úzdik er adam» júldesin Bekjan Turys, «Keıipkerge súıispenshilik» júldesin Jandarbek Sadyrbaev, «Lırıkalyq keıipker álemi» júldesin Dárııa Júsip, «Ekinshi kezektegi er adam» júldesin Baqtııar Qoja, «Este qalar keıipker» júldesin Baýyrjan Qaptaǵaı men Asylbek Boranbaı aldy.

«Ádil qazylar úshin tańdaý qıynǵa soqty. Óıtkeni, ártister sheberlikterin kórsete bildi, rejısserlyq jańa sheshimder boldy. Sondyqtan, teatrǵa bul festıvaldiń bereri úlken dep esepteımin», dedi ádil qazylar alqasynyń múshesi, teatr dırektorynyń ádebıet jónindegi keńesshisi Álııa Bópejanova.

Sondaı-aq, birqatar BAQ qyzmetkerleri teatrdyń bir jyldyq jumysyn nasıhattaǵany úshin arnaıy «Teatr jáne aqparat» júldesimen marapattaldy.