Almatyda krematorıı qashan salynady - ákimdik túsinik berdi
ALMATY. QazAqparat - Almaty ákimdigi qalada krematorıı qurylysy qashan bastalatynyn aıtty, dep habarlaıdy QazAqparat tilshisi.
«Buǵan deıin Almaty ákimdigi patologoanatomııalyq bıýro (máıithana) men krematorıı qurylysynyń jobalyq-smetalyq qujattamasyn ázirleýdi josparlaǵan bolatyn. Alaıda, jetkilikti qarjy bolmaǵandyqtan, krematorıı qurylysy keıinge qaldyryldy. Al 9 sáýirde Úkimettiń №187 Qaýlysymen krematorıı qurylysyna qarajat bólý týraly sheshim qabyldandy», - dep habarlady ákimdiktiń baspasóz qyzmetinen.
Qazirgi ýaqytta jobalyq-smetalyq qujattamany ázirleý jumystary bastaldy. Qujattama jasalyp, oń saraptamalyq qorytyndy shyqqannan keıin nysannyń qurylysy qarastyrylady.
Eske salaıyq, Almaty ákimdigi krematorıı qurylysynyń jobalyq-smetalyq qujattamasyn jasaýǵa tender jarııalaǵan bolatyn.
Tehnıkalyq sıpattamaǵa sáıkes, krematorıı bir zaldan jáne eki peshten turady. Joba qujattamasyn ázirleýge 46,8 mln teńge bólingen. Tapsyrys berýshi – «Almaty qalasy Jaıly qalalyq orta basqarmasy» kommýnaldyq memlekettik mekemesi.
