Almatyda kreatıvti ekonomıkany damytý baǵdarlamasy ázirlenbek
ALMATY. QazAqparat – Almaty qalasynyń ákimi Baqytjan Saǵyntaev qalanyń shyǵarmashylyq qaýymdastyq ókilderimen kezdesip, kreatıvti ekonomıkany damytý perspektıvalaryn talqylady, dep habarlaıdy QazAqparat tilshisi.
Kezdesýge ádebıet, jańa medıa, tsırk óneri, mýzyka, teatr, kıno, anımatsııa, jáne geımdevelopment, qolóner, sondaı-aq sán men komıks-ındýstrııa salalarynyń ókilderi qatysty.
Basqosýda kreatıvti ekonomıkanyń túrli salalaryn damytý máseleleri talqylandy.
Jıynda megapolıs ekonomıkasyndaǵy kreatıvti ındýstrııalardyń úlesin arttyrý sharalary pysyqtaldy. Qatysýshylar qalanyń barlyq aýdandarynda kreatıvti ındýstrııany damytý úshin ınfraqurylym qurý, bilim berý baǵdarlamalaryn jetildirý, shıkizat bazasyn, atap aıtqanda sán ındýstrııasyn arttyrý máselelerin kóterdi. Sonymen qatar, zııatkerlik menshikti kommertsııalandyrý, shyǵarmashylyq jobalardy qarjylyq jáne qarjylyq emes qoldaý sharalaryn damytý máseleleri qarastyryldy.
Kreatıvti ındýstrııalardyń qoljetimdilik aıasyn keńeıtýge erekshe mán berildi. Túsken usynystardyń ishinde daryndy balalar men jastar, sonyń ishinde kópbalaly jáne az qamtylǵan otbasylar úshin kýrstar uıymdastyrý tilge tıek etildi.
Baqytjan Saǵyntaev Almaty úshin álemniń úzdik 100 qalasyna ený mindeti tur ekenin atap ótti. Ol úshin ekonomıkanyń sapaly ósýin qamtamasyz etý qajet.
«Almaty-2050» Damý strategııasy aıasynda kreatıvti ekonomıkany damytatyn bolamyz. Ol úshin bizde barlyq múmkindikter bar», – dedi qala ákimi. Sondaı– aq, shahar basshysy bilim berý baǵdarlamalarynyń kreatıvti ındýstrııalar naryǵynyń suranystaryna sáıkes kelýiniń mańyzdylyǵyn atap ótti.
Shyǵarmashylyq qoǵam ókilderimen birlesip Creative Almaty strategııasy ázirlenbek. Damýdyń negizgi baǵyttary: mýzyka, ádebıet, teatr, opera jáne balet, sán, kıno men anımatsııa, jańa medıa jáne sandyq mádenıet, zamanaýı óner, oıyn-saýyq ındýstrııasy, sáýletpen dızaın, oıyndar men jarnama. Búginde Almatyda kásiporyndardyń jalpy sanynan kreatıvti ındýstrııalar úlesi 6,3%-dy ǵana quraıdy. Kreatıvti ekonomıka qalanyń ósýi men ál-aýqatynyń negizgi draıverleriniń biri bolady dep josparlanýda.
Jalpy jıynda kreatıvti ındýstrııalar óndirisiniń kólemin arttyrý úshin Almatynyń joǵary áleýeti bar ekeni atap ótildi. Búginde Almatyda kreatıvti ındýstrııany odan ári damytý úshin barlyq múmkindikter bar. Creative Almaty strategııasyn ázirleý otandyq mamandar men qazaqstandyq jobalardyń básekege qabilettiligin álemdik deńgeıde arttyrýǵa múmkindik beredi.