Almatyda QR UQK Shekara qyzmeti Akademııasynyń jańa oqý nysanynyń irgetasy qalandy (FOTO)
ALMATY. QazAqparat - Búgin Almatyda QR UQK Shekara qyzmeti Akademııasynyń jańadan salynyp jatqan Avtokólik ótkizý oqý beketiniń irgetasyna kapsýla salyndy.
Atalmysh rásimge QR UQK Shekara qyzmetiniń dırektory, polkovnık Darhan Dilmanov, Almatydaǵy AQSh Bas konsýlynyń mindetin atqarýshy Krıstofer MakKeıb, Shekara qyzmeti Akademııasynyń ofıtserleri men kýrsanttary jáne BAQ ókilderi qatysty.
Óz sózinde Darhan Dilmanov Akademııa aýmaǵynda jańa oqý nysanynyń salynýyn oqý orny úshin tarıhı oqıǵa dep baǵalady.
«Bul oqý nysany AQSh Úkimetiniń qarjylyq qoldaý kórsetýimen jáne AQSh Memlekettik departamentiniń «Eksporttyq baqylaý jáne shekaralar qaýipsizdigi» baǵdarlamasynyń kómegimen salynyp jatyr. Oqý ótkizý beketi bolashaqta QR UQK Shekara qyzmeti men Qyrǵyzstan, Tájikstan jáne Aýǵanstan Islam memleketi úshin shekaradaǵy baqylaý-ótkizý beketterinde qyzmet atqaratyn kásipqoı ofıtserlerdi daıarlaýǵa paıdalanylady. Qazaqstan - ashyq memleket. Ótkizý beketteri elimizdiń qaqpasy ispettes. Sondyqtan Qazaqstanǵa keletin sheteldik qonaqtar osy shekarashylar men ótkizý beketteri arqyly elimizdiń qandaı ekendigi týraly oı túıindeıdi. Bizde negizi, baǵdarlama boıynsha kýrsanttar alǵashqy eki jylda jalpy kýrs boıynsha, al keıingi eki jylda shekaralyq baqylaý mamandyǵy boıynsha bilim alady. Buǵan deıin kýrsanttar Almatydaǵy ótkizý pýnktinde jáne shekarada taǵlymdamadan ótetin. Bul basqasha deńgeı bolatyn. Al endi osy nysannyń arqasynda biz biliktiligi óte joǵary, myqty mamandardy daıarlap shyǵara alamyz», - dedi D. Dilmanov.
Sonymen qatar, ol bul nysanda jańa zamanaýı tehnıkalar ornatylatyndyǵyn aıtty.
«Bul jerde tólqujat tekserý qurylǵylary, sýyq qarýlardy jáne esirtki zattaryn anyqtaıtyn apparattar, radıatsııalyq sáýlesi bar zattardy anyqtaıtyn keshender ornatylady. Odan basqa, bul jerde oqý synyptary ashylady. Olar zamanaýı kompıýterlik tehnıkalarmen jaraqtandyrylady», - dedi D. Dilmanov.
Aıta ketelik, QR Shekara qyzmeti Akademııasy men AQSh-tyń Qazaqstandaǵy elshiligi arasyndaǵy yntymaqtastyq 2006 jyldan bastaý alady. Kúni búginge deıin AQSh elshiliginiń belsene aralasýymen 34 iri shara júzege asyrylypty. Endi, aldaǵy ýaqytta amerıkalyq áriptesterdiń qoldaýymen Akademııa aýmaǵynda úlken teksermeleý alańdary salynbaq. Ol jerlerge temirjol vagondarynyń, avtokólikterdiń jáne ushaqtardyń úlgileri qoıylatyn bolady. Sonymen qatar, taǵy bir oqý ortalyǵy salynady.
Al, jospar boıynsha Avtokólik ótkizý oqý beketiniń qurylysy bıylǵy jyldyń qazan aıynda aıaqtalady.
