Almatyda QR UQK Shekara qyzmeti akademııasynyń kýrsanttary Otan aldynda ant qabyldady

Kún salqyn bolsa da búgingi saltanatty rásimge óte kóp ata-ana jınaldy. Olardyń ishinde qarttar da, tipti sábılerin kóterip kelgender de boldy. Shekara qyzmeti akademııasynyń qaqpasy ashyla salysymen alǵa umtylǵan olar, uldaryn jaqsylap kórý úshin, yńǵaıly oryn izdep, saptyq alańnyń birese ana shetine birese myna shetine júgirip sharq uryp jatty. Tolqyp, kózderine jas alǵandar da boldy. Ádettegideı, alańǵa Shekara qyzmeti akademııasynyń jeke quramy men áskerı orkestri sap túzep shyqty. Keıin alańǵa saltanatty túrde atalmysh áskerı joǵary oq ornynyń jaýyngerlik týy shyǵaryldy. Budan soń, ata-analar men shekara qyzmeti ardagerleriniń qurmetine merekelik baǵdarlama qoıyldy. Eń aldymen Shekara qyzmetiniń moto-manevrlik desanttyq shabýyldaýshy «Boran» tobynyń áskerı qyzmetshileri avtomattan oqý jaýdyra otyryp, qoıan-qoltyq urys júrgizýdiń neshe túrli utymdy ádisterin kórsetti. Qulaq tundyrǵan atystan keıin, ónerpaz kýrsanttar tamyljytyp «Jasyl fýrajka» ánin shyrqady. Artynsha, alańǵa sap túzep shyqqan birinshi kýrs kýrsanttary aldynda sóz sóılegen Shekara qyzmeti akademııasynyń bastyǵy, polkovnık Pavel Polıvanov jas otan qorǵaýshylarǵa áskerı anttyń mańyzdylyǵyn uǵyndyrdy. «Áskerı qyzmetke kelgen Qazaqstannyń árbir azamaty Otan aldynda áskerı ant qabyldaıdy. Bul kóneden kele jatqan áskerı dástúr. El basyna kún týǵanda ata-babalarymyz óz halqynyń batyr qorǵaýshylary bolýǵa ant etetin bolǵan. Búgingi sapta turǵan birinshi kýrs kýrsanttary aldynda turǵan basty mindet ol, aǵa urpaqtyń qaldyryp ketken baı murasyn saqtap qalý. Áskerı antqa jáne boryshqa adal bolý, sondaı-aq áskerı namysty, abyroıdy saqtaý», - dedi polkovnık P. Polıvanov. Sonymen qatar ol, qazir álemde bolyp jatqan ár túrli kúrdeli jaǵdaılardardyń otan qorǵaýshylar aldyna jańa talaptar qoıatyndyǵyn jetkizdi. «Tek Ortalyq Azııa ǵana emes, búkil álemde bolyp jatqan ár túrli qarýly qaqtyǵystar, saıası jáne dinı ekstremızmniń taralýy ulttyq qaýipsizdik organdaryna jańa talaptar qoıady. Bul talaptardy oryndaý úshin árqaısyńyz áskerı bilimdi tolyqqandy meńgerip, tártiptiliktiń úlgisin tanytyp, shekarashylardyń áskerı dańqyn qadirlep, baǵalaı bilińizder», - dedi polkovnık P. Polıvanov. Budan keıin, Shekara qyzmeti akademııasynyń bastyǵy ant qabyldaýǵa buıryq berdi. Áskerı ant qabyldanyp bolǵan soń, polkovnık P.Polıvanov kýrsanttardy quttyqtady. Saltanatty rásimniń sońynda ulttyq ánuran oryndaldy.