Almatyda QR UǴA akademıgi Ǵ. Saparǵalıevti eske alýǵa arnalǵan konferentsııa ótip jatyr
ALMATY. 24 maýsym. QazAqparat /Názıra Eleýhan/ - Búgin Almatyda ál-Farabı atyndaǵy Qazaq ulttyq ýnıversıtetinde Memleket jáne quqyq ınstıtýty men Qazaq ulttyq ýnıversıtetiniń zań fakýltetiniń uıymdastyrýymen
«Qazaqstandyq qoǵamnyń jańartylýy jaǵdaıynda saıası júıeni qalyptastyrý jáne jetildirý (teorııa men tájirıbe máseleleri)» atty halyqaralyq ǵylymı-teorııalyq konferentsııa ashyldy. Atalmysh máslıhat QR UǴA akademıgi, z.ǵ.d., professor Ǵaırat Saparǵalıevti eske alýǵa arnalǵan.
Konferentsııa jumysyna ataqty ǵalymdar, qoǵam qaıratkerleri, joǵary oqý oryndarynyń, memlekettik organdardyń jáne Qazaqstan men sheteldik qoǵamdyq birlestikterdiń ókilderi qatysýda.
«Ǵaırat Saparǵalıuly - Respýblıkamyzdaǵy eń bedeldi jáne ataqty memlekettanýshy bolyp tabylady», -dep atap ótildi konferentsııanyń plenarlyq májilisinde.
Ál-Farabı atyndaǵy Qazaq ulttyq ýnıversıtetiniń zań fakýltetiniń dekany Dáýlet Baıdeldınovtyń aıtýynsha, búginde Ǵaırat Saparǵalıevtiń eńbekteri oqý, ǵylymı zertteý barysynda muǵalimder men stýdentter arasynda belsendi túrde zerttelip, oqytylyp keledi. «Akademık Saparǵalıev álemdegi ómirdiń ózgerýin sezine otyryp, árqashan azamattyq ustanymdy ustady, al ǵalymnyń kózqarasy men oıy Qazaqstanda júrgizilip jatqan quqyqtyq saıasattyń negizinde boldy»,-deıdi ol.
Ǵaırat Saparǵalıev - Respýblıkada jáne shet elderde shyǵarylǵan 300-den asa basylymnyń avtory. Akademıktiń ejelgi kezeńnen memlekettik basqarýǵa deıingi jáne táýelsiz Qazaqstannyń konstıtýtsııalyq qurylysyna deıingi kezeńdegi memleket jáne quqyq teorııasy men tarıhynyń máselelerine arnalǵan 60-tan astam monografııasy men oqýlyqtary jaryq kórgen.
Búgin tústen keıin ótetin konferentsııa jumysynda Qazaqstandyq qoǵamnyń jańartylýy jaǵdaıynda saıası júıeni qalyptastyrý jáne jetildirý boıynsha, Qazaqstannyń zańnamasy men saıası júıesin jetildirý baǵyttaryna usynystar men pikirler jáne quqyqtyq ǵylymdaǵy ózekti máseleler talqylanatyn bolady.
