Almatyda QR Tuńǵysh Prezıdenti N. Nazarbaevtyń balalyq shaǵy týraly túsirilgen fılmniń tusaýy kesildi

Fılmniń rejısseri - Rústem Ábdirashev. Týyndynyń stsenarıı avtory - Shahımarden Qusaıynov pen Rústem Ábdirashev. Fılmge Bıbigúl Tólegenova, Erjan Jarylqasynuly, Nurjuman Yqtymbaev, Almagúl Álisheva, Natalııa Orynbasarova syndy tanymal ártister túsken. Basty keıipker Elbasynyń balalyq shaǵyn - jas akter Eljas Álpıev oınasa, mekteptegi shaǵyn - Ábilmansur Serikov, jigit bolǵan kezin Nurlan Álimjanov somdaıdy.

«Fılmniń jelisi «Ádilettiń aq joly», «Ǵasyrlar toǵysynda», «Eýrazııa júreginde» kitaptarynyń negizinde jasalǵan. Munda Elbasynyń naqty ómiri kórkem shyndyqpen sıpattalady. Basty keıipker Sultan ushqysh bolýdy armandaıdy. Mektep bitirgen jyly Kıev azamattyq avıatsııa ınstıtýtyna oqýǵa da túsedi. Alaıda, taǵdyr joly ony basqa qıyrlarǵa bastaıdy....

Fılm basty keıipkerdiń dara bolmysyn, qaıratkerlik mineziniń qalyptasýyn, alǵashqy jeńisterin, úkili úmiti men asyl armanyn baıan etedi»,-dedi fılmniń rejısseri Rústem Ábdirashev.

Onyń aıtýynsha fılm bir jarym jylda túsirilgen. «Túsirilim Elbasynyń týyp ósken jeri Úshqońyr jaılaýynda, Shamalǵan aýylynda jáne Qaskelen qalasynda ótti. Akterlerdi uzaq tańdadyq. Basty keıipkerdi elimizdiń barlyq jerinen, oblystardan, mektepterden izdedik, tanystar arqyly da qarastyrdyq»,-dedi R.Ábdirashev. Onyń aıtýynsha fılmniń jalǵasy túsiriledi.

«Búgin biz úshin uzaq kútken premera. Almatylyqtar úshin kórsetilimdi arnaıy uıymdastyryp jatyrmyz. 7 sáýir kúni Astanada tusaýkeserin ótkizdik. Fılmdi tamashalaǵan qonaqtar «2011 jyldyń eń úzdik kıno týyndysy» degen baǵa berdi. Elbasynyń ózi de bul fılmdi eki ret kórdi, ol kisige unady. Fılmdi el táýelsizdiginiń 20 jyldyǵyna arnap otyrmyz»,-dedi Sh. Aımanov atyndaǵy «Qazaqfılm» kınostýdııasynyń dırektory Ermek Amanshaev. Onyń aıtýynsha, fılmniń bıýdjeti 3 mıllıon dollardy quraıdy.

Jalpulttyq tusaýkeser rásim ońtústik astanamyzdan bastalyp, Taldyqorǵan, Qaraǵandy, Pavlodar, Aqtaý, Oral, Óskemen, Shymkent, Taraz qalalarynda jalǵasyn tabady.

Fılmniń jalpyulttyq kórsetilimi búgin «Arman» kınoteatrynda saǵat 19.00-de bastalady.