Almatyda QR Tuńǵysh Prezıdenti Qorynyń tórt jylda shyǵarǵan kitaptarynyń kórmesi ashyldy

Kórmege sońǵy tórt jylda qordyń óz qarajatymen shyǵarylǵan 60-tan asa kitaptar qoıyldy. Onyń ishinde Uly Otan soǵysy týraly kitaptar, Muqaǵalı Maqataevtyń 80 jyldyǵyna arnalǵan kitaptar, jas daryndy aqyndar men jazýshylardyń kórkem shyǵarmalary, sonymen qatar Qazaqstannyń jas ǵalymdarynyń eńbekteri de bar. Ekspozıtsııaǵa ótken jyly Elbasynyń 70 jyldyq mereıtoıy qarsańynda Qazaqstan Respýblıkasynyń Tuńǵysh Prezıdentiniń Qory shyǵarǵan N.Nazarbaevtyń 7 kitaptan turatyn qazaq, orys, aǵylshyn tilindegi eńbekteriniń jınaǵy da qoıylǵan.

Kórmeni Qazaqstan Respýblıkasynyń Tuńǵysh Prezıdenti Qorynyń atqarýshy dırektory Bektas Muhamedjanov ashty.

"Shyqqan 60-tan asa kitaptardyń árqaısysy 500 danamen basylyp shyqty. Aldaǵy ýaqytta osy kitaptardyń elektrondyq nusqasy da shyǵatyn bolady. Basylyp shyqqan kitaptar ishinen Muqaǵalı Maqataevtyń 80 jyldyǵyna arnap shyǵarylǵan kitapty atap ótkim keledi. Bul kitapqa aqynnyń buǵan deıin esh jerde jarııalanbaǵan óleńderi enip otyr. Sonymen qatar 10 kitap bolyp shyqqan ardagerlerdiń estelik kitaptaryn erekshe atap ótkim keledi. Ol kitaptardyń ózgesheligi - onda Uly Otan soǵysynyń bastalǵannan bitkenge deıingi jyldary ardagerlerdiń óz kózderimen kórgen oqıǵalary jazylǵan",-dedi QR Tuńǵysh Prezıdenti Qorynnyń atqarýshy dırektory Bektas Muhamedjanov.

Onyń aıtýynsha, kitaptar qalamyzdyń 300-den asa ulttyq kitaphanalaryna, JOO-lary men mektep kitaphanalaryna tegin taratylatyn bolady.

Sharaǵa kitaptardyń avtorlary, Almaty qalasynyń qoǵamdyq uıymdarynyń, baspahanalary men kitaphanalarynyń, sondaı-aq, Qazaqstan Respýblıkasy Tuńǵysh Prezıdenti Qorynyń janyndaǵy shyǵarmashyl jastar jáne jas ǵalymdar Keńesteriniń ókilderi qatysty.

Shara barysynda Qor shyǵarǵan kitaptardy qalanyń kitaphanalaryna syıǵa tartý etý rásimi bolyp ótti.

Kórme jumysy qyrkúıektiń 25-ine deıin jalǵasady.