Almatyda QR Prezıdentiniń aýyzashary berildi
ALMATY. Tamyzdyń 27-si. QazAqparat /Erbol Turymbetov/ - Keshe Almatyda QR Prezıdentiniń qasıetti Ramazan aıyndaǵy aýyzashar berý rásimi ótti,
dep habarlaıdy QazAqparat.
Onda Almaty qalasynyń ákimi Ahmetjan Esimov, QMDB-nyń naıb-múftıi Muhammed Hýseın Alsabekov, Almaty qalasy Ortalyq meshitiniń bas ımamy Qulmuhammed qajy Mahambet jáne zııaly qaýym ókilderi boldy.
«Elimiz egemendik alǵaly eńsemizdi kóterip, dástúrimiz ben dinimizdi ulyqtaı bastadyq. Bul oraıda Elbasymyzdyń atynan jasalyp jatqan bul aýyzashar da sonyń dáleli. Bundaı ıgi shara byltyr da uıymdastyrylǵan bolatyn. Alla qalasa, osyndaı qasıetti ister árqashan jalǵasyn taýyp otyrady», dedi qala ákimi. Sonymen birge, A. Esimov mundaı sharanyń arab elderinde joǵary deńgeıde atalyp ótiletinin jáne budan bylaı qasıetti isti elimizde áli de keń kólemde ótkizý kerektigin atap ótti.
Aýyzashar dastarhany ákim sózimen ashyldy. Onan soń, musylmandyq jolymen quran oqylyp, aýyzashar batasy berildi.
