Almatyda QR Prezıdentin saılaý qorytyndylaryna arnalǵan «Elbasymen birge, alǵa!» atty forým bolyp ótti

Saltanatty jıynǵa Almaty qalasynyń ákimi Ahmetjan Esimov, Nursultan Nazarbaevtyń qalalyq qoǵamdyq shtabynyń, «Nur Otan» HDP-nyń músheleri, ulttyq etno-mádenı ortalyqtardyń, qoǵamdyq uıymdardyń, zııaly qaýymnyń, bıznes qoǵamdastyqtarynyń, jastar uıymdarynyń ókilderi qatysty.

Ahmetjan Esimov óziniń quttyqtaý sózin aıtyp, ótken Prezıdent saılaýynyń elimiz úshin asa mańyzdy ekendigin erekshe atap ótti. «Elbasynyń saılaýdaǵy asa iri jeńisi - elimizdiń oǵan degen orasan zor senimi, Táýelsizdigimizdiń 20 jyly ishindegi Memleket basshysynyń kemeńger saıasatynyń aıqyn jemisi. Bul - Qazaqstannyń ekonomıkadaǵy, saıasattaǵy, áleýmettik saladaǵy, halyqaralyq saıasattaǵy iri jeńisiniń nátıjesi. Prezıdenttiń kezekten tys saılaýynda halyq jasaǵan uly tańdaý Memleket basshysyn tolyq qoldaıtyndyǵyn jáne jarqyn bolashaq úshin daýys bergendikterin kórsetti»,- dedi qala basshysy.

Forým barysynda, osy saılaýda burynǵy saılaýlarǵa qaraǵanda almatylyqtar úlken belsendilik tanytqany atap ótildi. Sonymen qatar, «Kandıdattar úshin 690 myń almatylyq daýys berdi, bul 2005 jylǵy saılaýdan 1,5 esege kóp. Daýys bergenderdiń 90%-y óz daýystaryn Nursultan Nazarbaevqa bergen. Elimizdiń saılaý naýqanyn baqylaýshylardyń 30 paıyzy Almatyda jumys istedi. Saılaýdyń ótý úrdisine shet eldik baıqaýshylar da joǵary baǵa berdi», dep atap ótildi aktsııada.