Almatyda QR Prezıdenti muraǵatynyń jádigerleri jurtshylyq nazaryna usynyldy
ALMATY. Naýryzdyń 5-i. QazAqparat /Erbol Azanbek/ - Búgin Almatydaǵy QR Prezıdenti muraǵatynda «QR Prezıdenti muraǵatynyń jádigerleri» atty kórme ashyldy,
dep habarlaıdy QazAqparat.
Muraǵat dırektory Vladımır Şepeldiń aıtýynsha, muraǵatta keńestik dáýir, sonymen qatar Qazaqstannyń táýelsizdik jyldarynda jınaqtalǵan óte qundy jádigerler bar. «Bulardyń qatarynda keńes úkimetiniń qalyptasý jyldaryndaǵy saıası qaıratkerlerdiń ómiri, saıası qyzmetine baılanysty derekter, QR Tuńǵysh prezıdenti Nursultan Nazarbaevtyń Qazaqstannyń qalyptasý jyldaryndaǵy qyzmeti men rólin kórsetetin asa qymbat derekter bar. Búgingi kórme barysynda solardy jurtshylyq nazaryna usynýdy jón kórdik», deıdi muraǵat dırektory.
10 bólimnen turatyn kórmede 1988-2000 jyldar aralyǵyn beıneleıtin qujattar qoıylǵan. Olardyń qatarynda Álibı Jangeldınge 1917 jyly qyrkúıektiń 25-de Jumysshy jáne jaýynger depýtattarynyń sezdinde bergen kýáligi, S.Meńdeshevti Qyrǵyz ólkesin basqarý boıynsha áskerı-revolıýtsııalyq komıtetiniń múshesi etip taǵaıyndaý týraly V.Lenınniń qoly qoıylǵan mandaty, áıgili beseýdiń haty, qýǵyn-súrginge ushyraǵandardy Qazaqstanǵa jer aýdarý týraly qujattardyń túpnusqasy bar. Bunymen qatar Qazaqstan áskerleriniń Uly Otan soǵysyna qatysýy, tyń jáne tyńaıǵan jerlerdi ıgerý, Semeı polıgony týraly qujattar, Uly Otan soǵysyndaǵy fotosýretter, A.Baıtursynuly, A.Rozabakıev, L.Mırzoıan, S.Muqanov, A.Jubanov jáne basqa da qaıratkerlerdiń óz qoldarymen toltyrǵan ómirbaıandary, V.Lenın, S.Kırov, V.Molotov, J.Shaıahmetovterdiń qoltańbalary qoıylǵan qujattar bar.Muraǵat dırektorynyń aıtýynsha, bul qujattardyń kópshiligi Keńes úkimeti kezinde «Erekshe papkiler» qatarynda qupııa saqtalǵan.
Kórmeniń ashylýyna QR Parlamenti Májilisi tóraǵasynyń orynbasary Sergeı Dıachenko, Halyq Qaharmany, Keńes Odaǵynyń Batyry Saǵadat Nurmaǵanbetov, saıasattanýshy Sattar Májıtov, QR Prezıdenti janyndaǵy strategııalyq zertteýler ınstıýtynyń dırektory Bolat Sultanov, muraǵat mamandary qatysty.
