Almatyda QR Prezıdenti laýazymynan úmitker №17 emhanada boldy
ALMATY. 9 naýryz. QazAqparat /Aıgúl Turysbekova/ - Búgin Almaty qalasynda QR Prezıdenti laýazymynan úmitker azamat - el Parlamenti Senatynyń depýtaty, Qazaqstan patrıottary partııasynyń tóraǵasy Ǵanı Qasymov qalalyq №17 emhananyń ujymymen jáne emdelýshilerimen kezdesti.
Densaýlyq saqtaý nysany «100 mektep, 100 aýrýhana» baǵdarlamasy aıasynda salynǵan. Saılaýaldy shtabtyń jetekshisi Gúljan Nurpeıisovanyń aıtýynsha, QR prezıdenttiginen úmitkerdiń nasıhat naýqany densaýlyq saqtaý máselesinen bastaý aldy. «Biz, eldiń basty baılyǵy - adam men onyń densaýlyǵy dep bilemiz. Ókinishtisi, memlekettik qoldaýdyń túrli baǵyttary júzege asyrylyp jatqanymen, bul salada problemalar jeterlik. Onyń biri - medıtsına qyzmetkerleriniń jalaqylarynyń tómendigi. Osy másele búgin basqosýǵa qatysýshylardyń Ǵanı Qasymovpen kezdesýi barysynda áńgimege arqaý boldy», - dep atap ótti G.Nurpeıisova.
Onyń aıtýynsha, kandıdat mekemeniń jumysymen egjeı-tegjeıli tanysyp, emhananyń barlyq bólimshelerin aralap kórdi, ol kórsetetin barlyq qyzmetter men jumystarǵa qanyqty. «Eki taraptan da suraqtar kóp boldy. Ǵ.Qasymov emdelýshilerdiń, dárigerler men emhana qyzmetkerleriniń suraqtaryna naqty jaýaptar berdi. Kezdesý ózara túsinistik jaǵdaıynda ótti», - dep qorytty sózin shtab jetekshisi.
