Almatyda QR Bilim jáne ǵylym mınıstriniń qatysýymen JOO rektorlary keńesiniń otyrysy ótti
ALMATY. 15 qarasha. QazAqparat /Erbol Turymbetov/ - Qazaqstan Respýblıkasynyń Bilim jáne ǵylym mınıstri Baqytjan Jumaǵulovtyń qatysýymen Almatyda joǵarǵy oqý oryndary rektorlar keńesiniń otyrysy bolyp ótti.
Otyrysta JOO-daǵy profılaktıkalyq tárbıe jumysy, zań buzýshylyq pen quqyqtyq tártiptiń saqtalýyn qadaǵalaý basty nazarda bolýy kerektigi aıtyldy.
Jumys barysynda, bul máseleler sóz júzinde bar, is júzinde joqtyǵy baıqalǵan. Jastardyń tárbıesine degen mundaı jaǵdaılar, ýnıversıtetten tys jerdegi ortanyń keri áseri dep baǵalandy. Nátıjesinde, Almatydaǵy joǵarǵy oqý oryndarynda quqyq buzýshylyq, nashaqorlyq pen jastardyń ár túrli dinı sektalar men uıymdarǵa enýi baıqalýda. Resmı málimetter boıynsha, baǵyty túsiniksiz ıslamdyq aǵymdardyń basym kópshiligin dinı-ekstremıstik, terrorızm boıynsha 18-25 jas aralyǵyndaǵy jasóspirimder quraıdy. Osy faktiler ýnıversıtet rektorlaryna tez arada jastardyń júris-turysyndaǵy máseleler men áleýmettik qalyptasýyna tıisti sharalardy qoldanýdy mindettep otyr.
Jıynǵa qatysýshylardyń pikirinshe, eń aldymen, tárbıe jumysy mazmunyn jańalaý kerek. Arnaıy is-sharalarǵa stýdent ózi kelip, yntasymen qatysýyna jaǵdaı týǵyzyp, sharalardy stýdent úshin paıdaly etip uıymdastyrǵan abzal. Sondaı-aq, jastardyń tárbıe máselesin negizgi júıege qoıyp, stýdenttiń ózin-ózi basqarýy men qoǵamdyq basqarýdy keń aýqymda qarastyryp, jańa jobalarǵa den qoıý qajettigi aıtyldy.
Sonymen qatar, mınıstr BAQ-taǵy joǵarǵy oqý oryndarynda kórinis taýyp jatqan paraqorlyq materıaldary alańdatty. Ol rektorlarǵa osy máselege baılanysty árbir faktini tekserýdi, baqylaý jasap, árbir stýdent tarapynan jasalǵan paraqorlyq týraly suraqtardy qadaǵalaýdy mindettedi. Vedomstvo basshysy ýnıversıtetter bundaı is- áreketterge únemi shuǵyl jaýap berip, qatań tártipte baqylaýy tıistigin atap ótti.
Otyrysta Almatydaǵy joǵarǵy oqý oryndary rektorlarynyń osy jyldyń qazan aıynda mınıstrmen ótken birinshi kezdesýde berilgen tapsyrmasy boıynsha jasalǵan jumystardyń qorytyndy esep berý baıandamalary tyńdaldy. Esterińizge sala keteıik, ol kezde otandyq JOO-da oqý salasyn jetildirý, modernızatsııalaýdy júıeleý, jańa zamanaýı talaptardyń deńgeıine kóterý aıtylǵan bolatyn.
Rektorlardyń esep berý baıandamalaryna júginsek, búginde JOO túbegeıli ózgeristerge daıyn, mınıstrdiń aıtqan joǵarǵy oqý oryndaryna arnaıy jańa jobalar qajet ekendigi rektorlar tarapynan maquldandy. Kóptegen joǵarǵy oqý oryndarynda birinshi otyrystyń qorytyndylary talqylanyp, problemany sheshý joldary qarastyrylǵan. Keıbir oqý oryndary oqý júıesine túzetýler de engizgen, aldaǵy ýaqytta naqty sheshý joldary men usynystar júzege aspaq. Búginge deıin M. Áýezov atyndaǵy Ońtústik Qazaqstan Memlekettik ýnıversıtetinde tárbıe isi basqarý júıesiniń qurylymy uıymdastyrylyp, ıdeologııalyq tárbıe ortalyǵy qurylǵan, ǵalymdardyń jýrnaldarda joǵarǵy ımpakt-faktorlar týraly basylymdaryna materıaldyq ilgerileý, alǵa umtylys mehanızmi jasalǵan. Al S. Toraıǵyrov atyndaǵy Pavlodar memlekettik ýnıversıtetinde aýdandyq deńgeıdegi ǵylymı ınnovatsııalyq júıe qalyptastyrý usynylyp otyr.
